«Президент батыл және заманауи шешімдер қабылдауға тапсырма берді» деді Асхат Аймағамбетов

Парламент Мәжілісінің депутаты, «AMANAT» партиясының депутаты Асхат Аймағамбетов президенттің Үкіметке берген тапсырмаларына қатысты пікір білдірді, деп хабарлайды Azattyq Rýhy.

Депутат сөз басында президенттің берген тапсырмалары жүйелі өзгерістерге бағытталған қадамдар екенін айрықша атап өтті.

«Президент батыл және заманауи шешімдер қабылдау туралы тапсырма берді. Бұл қалыпты жолдармен жүретін емес, жүйелі өзгерістерге бағытталған қадамдар болуы тиіс. Мемлекет басшысы жаңа бағыттарды анықтап, елді заманауи, бәсекеге қабілетті экономикаға бастауға шақырды.

Әлеуметтік саясат: уақытша шешімдерге жол жоқ», — дейді депутат.

Айтуынша президент денсаулық сақтау, МӘМС және ауылдарды дамытуды косметикалық өзгерістер емес, жүйелі реформалар арқылы жақсартуды талап етті:

• МӘМС жүйесін әділ әрі ашық ету;
• Аудандар мен ауылдардағы медициналық инфрақұрылымды нығайту;
• Бизнес пен инфрақұрылымды дамыту арқылы ауыл шаруашылығын қолдау.

«Тікелей инвестициялар: болашақ технологиялар мен ресурстарға басымдық. Қиындықтарды ашық айтып, тікелей шетелдік инвестициялар 36%-ға төмендеді – бұл алаңдатарлық жағдай. Алайда жаңа бағыттар ұсынылды:

• Литий сияқты сұранысқа ие сирек кездесетін пайдалы қазбаларға назар аудару;
• Бюрократиялық кедергілерді жою және стратегиялық инвесторларға тартымды жеңілдіктер жасау», — деді Асхат Аймағамбетов.

Депутат сөзін жалғай отырып, Үкіметтің кеңейтілген отырысында туризм мен транспорт тақырыбында көтерілген мәселе туралы қозғап өтті.

«Туризм мен транспортты дамыту – жаңа идея емес, бірақ президент жай ғана дамуды емес, нақты серпін жасауды талап етті:

•  Туристік инфрақұрылым халықаралық стандарттарға сай болуы керек. Бұл Қазақстанды әлемдік саяхатшылар үшін жаңа магнитке айналдырады.
•  Қазақстанды транзиттік орталыққа айналдыру мақсатында теміржолдар мен халықаралық әуе хабының құрылысы жоспарланып отыр», — дейді мәжілісмен.

Энергетика: болашаққа арналған стратегия

• Атом энергетикасын дамыту;
• Өңірлерді газдандыру;
• Көмір станцияларын экологиялық таза технологияларға көшіру.

«Қаржы: компромисстерден гөрі әділ реформалар. Инфляциямен күресуде және салық-бюджет саясатын реформалауда ерекше тәсілдерді ұсынды:

• Шығындарды қатаң бақылау қажет;
• Қаржы саясаты қысқа мерзімді пайдаға емес, ұзақ мерзімді тұрақтылыққа негізделуі керек.

Ұлттық қор қаражатын дұрыс пайдаланбау қаржылық тұрақтылыққа қауіп төндіреді. Сондықтан бұл реформалар елдің экономикалық қауіпсіздігін қамтамасыз етеді.

Біршама мәселе заңнамалық өзгерістерді қажет етеді, және бұл бағытта белсенді жұмысқа қатысамыз», — деп Асхат Аймағамбетов сөзін қорытындылады.