15 жасында «сүйек жаңғыртқан» келіншектің қазіргі ауыр тағдыры

Менің кейіпкерім Меруертті 15 жасында нағашы мен жиен арасындағы қарым-қатынасы үзілмесін деп “сүйек жаңғырту” салтымен 27 жастағы жігітке тұрмысқа берген. Меруерт қазір 40 жаста. Күйеуі 54 жаста. Әйел 8 құрсақ көтеріп, 6 перзент аман-есен.

Ерлі-зайыпты 26 жыл бірге өмір сүрді. Күйеуім өмір бақи ішіп, психологиялық қысым жасады деп полицияға шағымданады. Ақпан айынан бері алты баланың анасы 4 қызымен “ата-енем қуды” деп жалдамалы пәтерді паналап жүр.

Екі қызы ерекше бала. Көпбалалы ана ажырасамын дейді. Екі ұлы анасына қарсы полицияға арыз жазып, әкесін жақтаған. Екі кәмелет жасқа толмаған қызы “шашымнан сүйреп, қылқындырды “ деп әкесіне өкпелі.

Кейіпкердің қайынатасы, енесі жүзі жылы , жақсы адамдар. Ол кісілердің де уәжін тыңдадым. Ерлі-зайыптының тұңғышы үйленген. Енді әйелі мен екі қызы тағы шағым жазса арақ құмар әкенің басы дауға қалатын түрі бар.

Күйеуі ажыраспаймын дейді. Бірақ ащы суға құмар еріне жары сенбейді.

Елімізде тұрмыстық зорлық-зомбылықтан жапа шеккендердің құқығын қорғайтын орталықтар ашылып, мұндай даулар болмайды немесе ұрыс-керіс ушықпай шешілер деп ойлаушы едім. Өкінішке қарай, Отбасын қолдау орталықтары мен полиция, бала құқығын қорғайтын мамандар қоян-қолтық жұмыс істейді деген қиялым қиял күйінде қалды.

Ал енді 15 жастағы қызды күйеуге бергенде шешесі қалай араша түспеген? Зіңгіттей еркек 54 жасқа келіп, өз ұясын бұзып, отбасын ойрандап жатқанын түсінбеді.

Әйелдің айтуынша 26 жыл аузы құрғамай ішіпті. Ол да төзімім таусылды деп жылайды. Бұл жерде екеудің аузынан бір-бірімізді жақсы көрдік

деген жүрек жылытар бір сөз естімедім. Қайынатасы келінін көргісі келмейді.

Даңғарадай үйдің іші әдемі. Ол үйден береке қашқан. Бір ата-анадан туған балалар екеуі әкесін қорғап, екеуі әкесінен қорғауды сұрап жатыр.

Ертең Дағдарыс орталығына барамын. Осындай отбасылардың дауын неге шешпейді?

Балалар құқығын қорғайтын мамандар неге үнсіз? Қыздар отбасындағы дау-жанжалды ел білсін деді ме, екі күн сабаққа бармаған!

Бұл жайында деректі анықтау және қандай шара қолданды деп сұрау мақсатында мектепке бардық. Оқу меңгерушісі оператордың камерасына жармасты. Боевик апай екен. Ұстаз солай шабуыл жасайды деп кім ойлаған.

Тасбөгет кентінде полиция бөліміне барып, тағы бір әйел жылап отыр. Екі қабырғасын күйеуі сындырып, полиция алдында “өз әйелімді ұрамын, шаруаң болмасын” деп діңкілдеп тұр.

Жазира БЕГАЛЫ, журналист.

Facebook жазбасы.

Фото автордың парақшасынан.