Африкалық жігітке тұрмысқа шыққан атыраулық қыз қоғам тарапынан көрген қысымын ашық айтты

Атыраулық Зайда Онуоро африкалық күйеуіне тұрмысқа шыққаннан кейін көшеде көрген қысым туралы Qazaq Airan арнасына сұхбат берді.

Атыраулық Зайда Онуоро қара нәсілді азаматқа тұрмысқа шыққаннан кейін өмірінде кездескен қиындықтар туралы Qazaq Airan YouTube арнасына берген сұхбатында баяндады. Ол өз таңдауы үшін қоғам тарапынан едәуір қысым көргенін айтты.

«Күйеуге шығатынымды естіген кезде анам ‘жұрт не дейді?’ деді. Бірақ менің өмірім – менің бақытым. Өзім шешемін дедім. Кейін анам келісті. Әкем туыстарымызды жинап, ‘қызым Африкаға кетейін деп жатыр, біз қарсы емеспіз’ деп, әңгімені аяқтады. Содан кейін туыстар тарапынан еш қарсылық болған жоқ», – деді Зайда.

Алайда, Зайда өзінің отбасылық өміріне қатысты қоғамда жағымсыз пікірлер мен нәсілдік кемсітушілікке жиі тап болғанын жасырмады.

«Көшеде айқайлап, боқтық сөздер айтып, тіпті ‘қазақ қараған жоқ, өлтіру керек, баласын құдыққа тастау керек’ дегендер болды. Бұл пікірлердің көбі – ер адамдардан. Ал әйелдер жағы ‘алқаш болса да қазақ болсын, таяқ жесем де өз қазағымнан жейін’ дегендей пікір айтты», – дейді ол.