Бұл ұсыныс хиджаб дауына нүкте қояды

0
273

Депутат Дәулет Мұқаев мектеп оқушылары киетін ұлттық киімдер стандартын әзірлеп, халықаралық түрлі жарыстарға (ғылыми олимпиада, спорт) баратын азаматтардың формаларына міндетті түрде ұлттық нақышты бейнелеу керектігін айтты, деп жазады Democrat.kz тілшісі.

Депутаттың сөзінше, елде ұлттық киімді насихаттау тек бір реттік челлендждер мен акциялармен ғана ұлықталуда. «Соңғы уақытта жалпы халық арасында «Ұлттық сезім» жалпыұлттық акциясы басталып, ел арасында кеңінен қолдау тауып келеді.

Акцияны зиялы қауым өкілдері, журналистер мен блогерлер, оқу ордалары қолдап, аптаның әр жұмасында ұлттық нақыштағы киімдерді киіп жүргендер қатары көбейді. Осы акцияны бастаған азаматтарға ерекше алғысымды білдіремін. «Ұлттық киімдерді тек наурызда ғана емес, жай күндері де жиі киіп жүруіміз керек» — деп президентіміз де үндеу тастаған еді», — деді Мұқаев.

Ол алдағы уақытта ұлттық нақыштағы киім кию дәстүрін тек Наурызбен, акциялармен ғана шектемей, оны трендке айналдыру қажет екенін айтты. Депутаттың айтуынша, қырғыз халқы 5 наурызды — «Айыр қалпақ күні» деп мемлекеттік деңгейде бекітіп, ЮНЕСКО-ның материалдық емес мәдени мұраларының тізіміне енгізген. Дәулет Мұқаев үкіметке мына шараларды қолға алуды ұсынды. «Біріншіден, ұлттық киімдерімізді ұлықтау мақсатында республикалық деңгейде «Ұлттық киім» күнін бекіту.

Бұл күн мәдени құндылықтарымызды кеңінен насихаттап, өскелең ұрпақты отаншылдыққа тәрбиелеудің негізі болар еді. Екіншіден, мемлекеттік қызметкерлер мен халыққа қызмет көрсететін орталық қызметкерлерінің киімдеріне қазақи айдентика элементтерін қосу. Үшіншіден, Ұлттық киім өндіретін отандық кәсіпкерлерге мемлекет тарапынан қолдау көрсетіп, бизнесті қолдауға бағытталған гранттарда ұлттық киім кәсібіне басымдық беру.

Халық арасында ұлттық киімді қолжетімді етуге ықпал етіп, сұранысты арттыру; Төртіншіден, мектеп оқушылары киетін ұлттық киімдер стандартын әзірлеп енгізу, әрі халықаралық түрлі жарыстарға (ғылыми олимпиада, спорт) баратын азаматтардың формаларына міндетті түрде ұлттық нақышты бейнелеу», — деген ұсынысын айтты депутат.

Осыған орай интернеттегі әлеуметтік желіде айтылған пікірлердің басым бөлігі тек қолдау тұрғысында өрбіді. “Бұл — ең керемет ұсыныс. Онсызда аптаның әр жұмасында мектебімізде ұлттық киім киеміз. Оюлы камзолды иығымызға ілген сәттен бастап, кеудемді бір ғажайып мақтаныш кернейді. Ұлттық рух дегеніміз осындай қарапайым дүниелерден оянатын болса керек”, — дейді Алматы қаласындағы №107 мектеп-лицей оқушысы Мисир Әмина.

Ал Солтүстік Қазақстанның өзге ұлты қалың шоғырланған Қызылжар қаласы, ӘлФараби атындағы №18 мектеп-лицейдің оқушысы Дильназ да бұл ұсынысқа қатысты қуанышын жасырмай: “Біздің мектеп-лицейде де ұлттық нақыштағы киім кию үрдісі бар. Әсіресе бастауыш сынып оқушыларының үстінен қазақы камзолдарды көргенде ұлтыңа деген сүйіспеншілігің арта түседі. Алдағы уақытта бүкіл еліміздің мектеп оқушылары ұлттық киім үлгісіндегі формаға көшсе, нұр үстіне нұр болар еді”,- дейді. Ал түркістандық мұғалім Зейнеп Сағындыққызы депутаттың бұл ұсынысы жыл сайын болатын хиджаб дауының нүктесін қояды деп сенеді.

 

Зубайра ЛЕСБЕК,

Democrat.kz 

Фото ашық дереккөзден алынды.