«Қазақстан Ресейге толықтай тәуелді болуы мүмкін» дейді әскери профессор
Әскери ғылымдар академиясының президенті Мұхтар Серкпаевтың билікті сынаған видеосы желіде тарады, деп хабарлайды “Адырна” ұлттық порталы.
Видеода Мұхтар Серкпаев Қазақстанның Ресейге толықтай тәуелді болу қауіпі барын айтады.
«Халық арасында елдің сатылып жатқандығы туралы пікір таралуда. Бұл уран кеніштері мен алтын шахталарын, энергетикалық құрылымдар мен атом электр станцияларын Ресейге сату мәселелеріне байланысты айтылып жатыр.
Нәтижесінде Қазақстанның толықтай Ресейге тәуелді болуы мүмкін деген қауіп бар. Бұл жағдай елдің экономикалық тұтастығы мен тәуелсіздігіне қауіп төндіреді.
Біз өз жерімізде, өз елімізде Палестина сияқты болуымыз мүмкін. Сондықтан, билік басындағылар бұл мәселені тереңнен ойлап, халықтың көңіл-күйін ескеруі керек.
Себебі, әскери қызметкерлер мен қауіпсіздік органдарының арасында наразылық көп. Халықтың жағдайын жақсарту үшін қабылданған міндеттемелерді орындау, халықтың әл-ауқатын қамтамасыз ету маңызды.
Қазіргі уақытта түрлі арналарда бұрынғы министрлер мен әкімдердің халыққа жақсы ұсыныстар айтатыны да байқалуда», — дейді Мұхтар Серкпаев видеода.
Айта кетейік, Мұхтар Серкпаев — әскери ғылымдар бойынша маманданған профессор, Қазақстан Республикасы және Ресей Федерациясы Ғылым академиясының толық мүшесі, Ресей Федерациясы Әскери ғылымдар академиясының А.Свечин атындағы және 21 ғасыр қауіпсіздігі сыйлығының лауреаты.
Фото видеодан скринделіп алынды.
