“Менің атым – Қожадағы” Жұмағұлдың Дәулеті қазір қайда?
Қазақтың әйгілі “Менің атым – Қожа” фильмінде Жұмағұлдың Дәулеті болып ойнаған – Юсуф Шамузов. Алматы қаласында дүниеге келген дүнгеннің баласы. Бір қызығы – бала жасынан актер болуды емес, дәрігер мамандығын қалаған.
Яғни оның киноға түсуі кездейсоқ оқиға. Фильмнің режиссері Абдолла Қарсақбаев естелігінде: “Лайықты бала таба алмай, сарылып, бітіп тұрғанымызда, бір көмекшім: “Біздің бір көрші дүнгеннің кішкентай, тақылдап тұрған Юсуф деген баласы бар, соны көрсек қайтеді?” – дегені.
Барсақ, түрі де келеді, өзі де тақылдап тұр, табанда қабылдадық. Бірақ, бір ғана анадай жерде тұрған бөшкеден су әкелдіруге бір күн уақытымыз кетті.
Бірде бара жатып, айдалаға жүгіріп кетеді, енді бірде өзі су ішіп, сосын жан-жағына шашып ойнай ма-ау, тіпті бірде даладағы көбелекті қуып кетіп қалды.
Қойшы, әйтеуір, ақыр аяғында бүкіл тобымызбен көбелек қуып, бір қорапша көбелекті сыйға тартып, зорға көндіргенбіз”, – деп түсірілім алаңындағы қызықты сәтті есіне алады.
Юсуф Шамузов кейіннен Ленинградтағы медициналық институтты бітірді. 1983 жылдан Қазақстанның бокс құрамасында бас дәрігер қызметін атқарды.
Ол бұл күнде Дубай қаласының тұрғыны. Біріккен Араб Әмірліктерінде бапкер де, дәрігер де болып еңбек етіп жүр.
