Самарқандта шешуші ойындар әлі алда, ал Қазақстан шахмат федерациясының президенті Тимур Турлов құрамаға сенімін қазірден білдірді. Әйелдер командасы қатарынан алты жеңіске жеткен тұста ол қазақстандық шахматшылармен кездесіп, қандай нәтиже болса да, қолдау үзілмейтінін айтты, деп хабарлайды Democrat.kz.
Кездесу 22 қыркүйекте — 46-шы шахмат Олимпиадасының шешуші кезеңі алдындағы жалғыз демалыс күнінде өтті. Турловпен бірге Қазақстанның ерлер және әйелдер құрамаларына елдің Өзбекстандағы төтенше және өкілетті елшісі Ералы Тұғжанов келді.
Турлов спортшыларға алдыңғы күнгі ойындарын атап өтіп, жігер берді:
«Біз бірге осы бағытта жылжып, жыл сайын мақсаттарымызға жақындай түскенімізге өте қуаныштымын. Әрине, биыл бізде керемет нәтиже көрсетуге барлық мүмкіндік бар. Кешегі күн біздің команда үшін өте жақсы болды және бізге маңызды жеңістер әкелді. Сіздер өте күшті қарсыластарға қарсы керемет ойын көрсеттіңіздер. Алдарыңызда тағы көптеген керемет партиялар болсын. Біз әрқашан сіздермен бірге екенімізді ұмытпаңыздар. Өз күштеріңізге және жеңіске сеніңіздер», – деді Қазақстан шахмат федерациясының президенті Тимур Турлов.
Әңгіме Олимпиададағы ұпай мен орын төңірегінде ғана өрбіген жоқ. Турлов ел құрамасына қарап шахматқа қадам басатын балаларды да сөз етті:
«Біз сіздерді өте жақсы көреміз және кез келген жағдайда сіздермен бірге боламыз. Сіздер шынымен үлкен жетістіктерге лайықсыз деп сенеміз. Сіздердің жетістіктеріңіз бүгінде еліміздің түкпір-түкпіріндегі шахмат клубтарына енді ғана келіп жатқан жас шахматшыларға үлкен шабыт болады. Шахматтың арқасында олар әлемді көре алады, жаңа мүмкіндіктер алады және үлкен биіктерге жетеді. Сіздер қазірдің өзінде, әрине, әлемдік шахмат элитасысыздар», – деп атап өтті Тимур Турлов.
Құраманың қазіргі нәтижесі де үмітті күшейтіп отыр. Қазақстан әйелдер командасы алты турда бірде-бір командалық ұпай жоғалтпай, алты рет жеңіске жетті. Жинаған 12 командалық ұпайы көш басындағы Қытаймен бірдей. Қытай қосымша көрсеткіштерінің арқасында ғана алда тұр, Қазақстан — екінші орында. Алтыншы турда қазақстандық шахматшылар Әзербайжанды 2,5:1,5 есебімен жеңді.
Елші Ералы Тұғжанов Қазақстан шахматшыларына назардың жоғары екенін айтып, жарысты ұйымдастырушыларға да алғыс білдірді:
«Бұл тарихи оқиға. Орталық Азияда мұндай ауқымдағы, 200-ге жуық мемлекет өкілдері қатысатын шахмат Олимпиадасы алғаш рет өтіп жатыр. Мұнда қонақтар мен қатысушылар өте көп. Осы іс-шараны ұйымдастырушыларға алғыс айтқым келеді – бәрі өте жоғары деңгейде ұйымдастырылған. Мен бүгінде Қазақстан құрамасына қандай назар аударылып жатқанын көріп отырмын. Бұл қазақстандық шахматтың бүгінде әлемде лайықты орын алып отырғанын білдіреді. Сондықтан біз өз жігіттерімізге сенеміз, біздің команда лайықты орын алады деп сенімдімін», – деді Ералы Тұғжанов.
Жарыстың шешуші кезеңі жақындаған сайын шахматшыларға түсетін салмақ та артады. Құрамалардың бас жаттықтырушысы Павел Коцур алдағы ойындарда зейінді сақтаудың маңызына тоқталды:
«Біз қазір ең жоғары орынға өте жақынбыз, сондықтан біздің қыздардың нәзік иықтарында екі есе жауапкершілік жатыр. Командада екі жаңа, жас спортшы бар. Алда өте байсалды қарсыластар күтіп тұр, сондықтан қыздарға барынша концентрацияны сақтау керек. Сонымен қатар командадағы атмосфера жай ғана керемет», – деді Павел Коцур.
Ерлер құрамасы да алтыншы турда жеңіске жетіп, күресті жалғастырып келеді. 21 қыркүйекте Қазақстан Колумбияны 3,5:0,5 есебімен ұтты. Құрама капитаны әрі жаттықтырушысы Әнуар Исмағамбетов бұл жолы команданың басым бөлігін жастар құрайтынын айтты:
«Ерлер құрамамыз қазір жартысынан астамы жаңарды: командада жас жігіттер көп. Сонымен қатар атмосфера өте достық. Жұмысқа келгенде жігіттер барынша берілуге тырысады. Шығындарсыз болған жоқ, сәтсіздіктер болды, бірақ соған қарамастан біз жақсы позициядамыз. Алдағы барлық дерлік матчтар бізді рейтинг бойынша озып тұрған командаларға қарсы болады. Бірақ жігіттерді бұл мазаламайды. Олар өздеріне соншалықты сенімді, мұндай қарсыластармен кемінде тең тұрады», – деді Әнуар Исмағамбетов.
23 қыркүйектегі жетінші турда әйелдер құрамасы көшбасшы Қытаймен, ал ерлер Сербиямен кездеседі. Екі ойын да жергілікті уақытпен сағат 15:00-де басталады. Швейцариялық жүйемен 11 турға созылатын 46-шы шахмат Олимпиадасы 27 қыркүйекте аяқталады.
Самарқандта Турловтың өзін де маңызды бәсеке күтіп тұр. 26 қыркүйекте Халықаралық шахмат федерациясының (ФИДЕ) Бас ассамблеясында ұйым президенті сайланады. Қазақстан шахмат федерациясының басшысы осы лауазымға үміткер. Онымен жұптасып, президенттің орынбасары қызметіне бес дүркін әлем чемпионы Вишванатан Ананд ұсынылған.
Сайлауға үш жұп қатысады: Тимур Турлов – Вишванатан Ананд, Ян Хенрик Бюттнер – Малкольм Пейн және Вадим Розенштейн – Гордон Танг. Бас ассамблеяда өкілдік ететін әр ұлттық федерацияның бір дауысы бар.
Бұл кездесуде қолдау екі жақтан да айтылды: спортшылар мен жаттықтырушылар да Турловқа алдағы сайлауда жеңіс тіледі.
