«… бастарына берсін осы күнді» деп күйінді марқұм Шерзаттың әжесі

Марқұм Шерзаттың әжесі  Instagram-дағы Almaty.official парақшасында видеоүндеу  жариялады.

«Бізді осы дәрежеде қорлайтындай біз не жаздық бұларға? Не кінәміз болды? Біз олардан пиво сұрап, арақ сұрап, үйлеріне, магазиндеріне барғанымыз жоқ қой.

Олар кінәлі адамдар емес пе, өздері келіп, өздері тиісіп, өздері бастап тұр. Енді заң орындарында адамдары бар. Сол заң орындарындағы адамдар, азаматсыңдар ғой сендер де, сендердің бастарыңа түспей ме сондай күн?

Алладан қорықпайсыңдар ма? Жаратушы иенің бар екенін сол дәрежеде сенімдеріңнің жоқтығына таңқалам. «Видео жоқ» дедіңдер де, қайтадан бөліп-бөліп өздеріңе ыңғайлап әр жерді кесіп, мына жері мынадай деп салып отырсыңдар.

«Аққа құдай жақ» деген, бірақ менің балаларым адам өлтірген жоқ. Адамның қанын ішкен жоқ. Өздеріңнің намыстарың білсін, – дейді әжесі.

Ол қайғы өздерінің бастарына түспесе, түсіну қиын екенін айтады.

«Оралман» деп, «сырттан келгендер» деп осындай дәрежеге әкеліп отырған болсаңдар, мен қаңғып келген адам емеспін. Өзімнің атамекеніме, жұртыма, еліме көшіп келген адаммын.

Мен 1989-да көшіп келген адаммын. Менің бала-шағам осы жерде туылды, қаны осы жерде тамды, осы жерде саналы азаматтар болып өсіп жатыр.

Бәрінің құжаты бар, Қазақстан азаматы мен азаматшалары, ел елегінен өткізіп, сабырға келіп, ақ-қарасын, не болып жатқанына ақыл қосасыңдар, қаралайсыңдар ма өздерің білесіңдер.

Мынау түсініксіз жағдай, қатты түсініксіз жағдай, менің балам өліп ауруханада жүрдім, моргта жүрдім, баламды қоям деп жүрдім. Сол аралықты пайдаланып, осындай видео шығарғанда, жоқ боп кеткен кезде видеоларды өздеріне ыңғайластырып қосып жатқан азаматтардың бастарына берсін осы күнді. Басқа айтар сөзім жоқ, – дейді марқұм Шерзат Болаттың әжесі.

Фото интернеттен алынды.