Асхат Аймағамбетов: «Білім процесі хаосқа айналады»

Павлодар қаласы Білім басқармасы қаладағы бірнеше мектепте сабақ ұзақтығын қысқартқан болатын, деп хабарлайды Ulysmedia.kz.

40 МИНУТ

Ата-аналар мен оқушылардан 45 минуттан оқыған кезде екінші ауысым сабақтарының кеш аяқталуына қатысты өтініштер келіп түсті. Соңғы сабақ сағат 20:40-та аяқталды.

Осы талаптарды ескере отырып, уақыттың өзгеруі мен азаматтардан түскен өтініштерге байланысты Павлодар қаласының 7 мектебінде (№21,29,39,43 ЖОМ, Ш. Шөкин, Байтұрсынұлы, Әуезов атындағы) 2 және 4 сабақтан кейін сабақтарды 40 минутқа дейін қысқарту және 15 минуттық үзіліс ұйымдастыру туралы шешім қабылданды, онда оқушылар саны 2000-нан асады, — делінген Білім басқармасының ресми жауабында.

Бүгінгі таңда осы жалпы білім беретін мектептердегі сабақтар сағат 19.20-да аяқталады.

ХАОСҚА АЙНАЛАДЫ

Осыған қатысты бұрынғы Білім және ғылым министрі, депутат Асхат Аймағамбетов пікір білдірді.

Павлодар облысының басшылары сабақтарды 30 минутқа дейін қысқартуды ойлап таппағанына шүкір! Бұндай логикамен, енді жаңа мектептер салмай-ақ, төрт ауысымға көшіп, миллиардтаған қаражатты үнемдеуге болар еді.

Шынын айтқанда, Павлодарда сабақтарды қысқарту көптеген сұрақтар туғызады – дейді мәжіліс депутаты Асхат Аймағамбетов.

Аймақтарда сабақтың ұзақтығын өздері шешіп, әкімдікке ыңғайлы кез келген жағдайда онлайн оқуға көшетін болса, оқу процесі мүлдем хаосқа айналады.

БІРІЗДІЛІК ЖОҚ

Бағдарламалардың мазмұны, білім мақсаттары өзгермей қалай сабақты қысқартуға болады? Бұл білім сапасына және барлық оқушыларға сапалы білім алу үшін тең жағдай жасауға үлкен проблемалар тудыратыны анық.

Қызық парадокс: бір жағынан, ел бойынша бірыңғай уақыт белдеуі енгізіліп жатыр, ал екінші жағынан — әр облыс сабақтың ұзақтығын өзі шешеді. Бірізділік қайда? Ғылымға негізделген шешім қайда? – дейді Асхат Аймағамбетов.

Білім беру объектілеріне қойылатын санитарлық-эпидемиологиялық талаптардың 71-тармағына сәйкес жалпы білім беретін ұйымдағы сабақтың ұзақтығы 45 минуттан аспауы тиіс.

Жалпы білім беретін ұйымдардың барлық түрінің оқушылары үшін сабақтар арасындағы үзілістердің ұзақтығы кемінде 5 минут, үлкен үзілістер (2 немесе 3 сабақтан кейін) – 30 минут. Бір үлкен үзілістің орнына екінші және төртінші сабақтардан кейін әрқайсысы 15 минуттан екі үзіліс жасауға рұқсат етіледі.

Фото интернеттен алынды.