"Болашақ" бағдарламасына жаңа шарттар енгізілді

21 января 2025

331

"Болашақ" бағдарламасына жаңа шарттар енгізілді

Болашақ бағдарламасымен оқығандар енді белгілі бір шарттарын орындаса, елге қайтпауына болады, деп хабарлайды inbusiness.kz сайты. Жаңартылған ережеге сәйкес, іріктеуден өткендер ғана шәкіртақы ала алады. Бұрын жыл соңына дейін күту қажет болса, енді сол күнтізбелік жыл ішінде қайта өтініш беруге болады. Осы уақытқа дейін стипендиаттар Қазақстанға оралып, елде кемінде бес жыл жұмыс істеуі керек еді. Бұл талап енді міндетті емес.

"Бағдарлама түлектерінің Қазақстан мүшелік ететін БҰҰ, ЮНЕСКО, ШЫҰ және ТМТ сияқты халықаралық ұйымдарда жұмыс тәжірибесінен өтуге мүмкіндігі бар”, – деп хабарлады министрліктің баспасөз қызметі.

"Болашақ" мүшелері енді шетелде тек халықаралық ұйымдарда ғана емес, тағы екі нұсқа бойынша еңбек тәжірибесінен өте алады: Акцияларының немесе жарғылық капиталының 50%-дан астамы Қазақстан Республикасына тиесілі компанияларда. Акцияларының немесе жарғылық капиталының 50%-дан астамы Қазақстанның ұлттық компанияларына тиесілі компанияларда. Тағы бір жаңалық мемлекеттік қызметкерлерге қатысты. Енді олар тіл курстарынан өту мүмкіндігімен шетелде магистратурада оқи алады. Министрлік атап өткендей, бұл мемлекеттік аппараттың тиімділігін арттыруға бағытталған.