Бүкіл оқушыны хиджабқа ораған Сайдакбар Мирзоев ҚР Ата заңына неге бағынбайды?

19 марта 2025

2966

Бүкіл оқушыны хиджабқа ораған Сайдакбар Мирзоев ҚР Ата заңына неге бағынбайды?

Түркістан облысы, Мақтаарал ауданында мектептің оқушылары хиджабпен оқуға барып жүргені туралы ақпаратты әлеуметтік желіге жариялағаны үшін қоғам белсендісі Нұржамал Реметованың үстінен діндар Сайдакбар Мирзоев шағым түсіріпті деп жазады Democrat.kz. Еске салып өтейік, Сайдакбар Мирзоевтың талабымен Мақтараарал ауданындағы Фирдоуси мектебінің оқушы қыздары мектепке хиджабпен оқуға барып жатқанын біз де жазған едік. Өзінің діни сеніміне байланысты қыздарын мектепке хиджабпен жіберуді талап етіп, сол талабын орындатып қана қоймай, мектептің басқа да қыздарын хиджабқа орауға қол жеткізген Сайдакбар Мирзоев енді қоғам белсендісі Нұржамал Реметованың үстінен полицияға арыз түсірген. "Хиджап дауы" деген пост үшін Сайдакбар Мирзоев мені ҚК-тің 174- бабының 1-тармағымен, ӘК-тің 73-3 бабының 1-тармағымен айыптап мілитсаға беріпті, ағайын. Ана арызды оқысам, Құдай-ау, менің бір постымның ішінде жоқ нәрсенің өзі жоқ.

Әлгі пост арқылы "әлеуметтік желі арқылы қасақана азаматтардың ұлттық ар-намысы мен қадір-қасиетін және діни сезімдерін қорлап, сонымен қатар мемлекеттік билік беделіне нұқсан келтіріп,халықтың билікке деген сенімсіздігін және қарсылығын тудырып, дін және сенім-наным негізіндегі шыдамсыздық пен кемсітушілік жасап,әлеуметтік, ұлттық астамшылықты,қатыгездік пен зорлық-зомбылықты насихаттап" тастаппын. Бұл аз десеңіздер, Сайдакбардың "ата-ана ретінде абыройына ,қадір-қасиетіне нұқсан келтіріп,беделін түсіріп", "тоқсан ауыз сөздің тобықтай түйінін" айтсам,бүлдірмегенім жоқ сияқты.

Алақандай постың ішіне мұның бәрін қалай сыйғызғам деп, "апам да аң-таң, мен де аң-таңның" күйін кешіп отырмын" деп жазды Нұржамал Реметова. Қоғам белсендісінің бұл жазбасына қатысты жұрт "қазақтың ұлтын, дәстүрін, заңын қорлап, мазақ еткендерге қатысты ешкім заңды жауапқа тартылмайды. Ал егер дінге қатысты аузыңды ашсаң, бірден жауапқа тартылатын болдық" дегенге саятын пікірлер жазуда. Қазақстан - зайырлы мемлекет екені заңда анық жазылған. ҚР Білім туралы заңында әр оқушының тиісті ережеге сай арнайы киіммен мектепке баруы да нақты талаппен көрсетілген. Өз діни сенімін алға тартып, оқушыларды хиджабқа ораған Сайдакбар Мирзоевтың талаптары Ата заңымыздан да жоғары болғаны ма, бұл қалай? Дайындаған - Мәриям КЕНЕСАРЫ. Фото көрнекілік үшін.