Астанада бұрынғы дипломат Сәкен Мамаш қамауға алынды

04 сәуір 2025

1191

Астанада бұрынғы дипломат Сәкен Мамаш қамауға алынды

Астана Полиция департаменті әйелін ұрды деп айыпталған бұрынғы дипломат Сәкен Мамашқа қатысты қылмыстық іс бойынша тергеудің егжей-тегжейін айтты. Ведомствоның баспасөз қызметі мәліметінше, былтыр құқық қорғау органдары Қазақстанның елшілігінде қызмет атқарған бұрынғы кеңесшіге қатысты жұбайына жүйелі түрде қол жұмсау дерегі бойынша қылмыстық іс қозғаған.

"Полиция тарапынан жедел-тергеу тобы құрылып, оқиғаның барлық мән-жайын анықтау үшін қажет сараптамалар жүргізілді. Айтарлықтай дәлелдер жиналды", – деп жазылған департамент хабарламасында.

Тергеу нәтижесі бойынша тергеу соты күдіктіге "қамауға алу" түріндегі бұлтартпау шарасын таңдаған. Ведомство мәліметінше, тергеу мүддесіне байланысты соталды тергеудің басқа мәліметтері жарияланбайды. Айта кетейік, бұған дейін "НеМолчи.kz" қоры БАӘ-дегі елшіліктің кеңесшісі Сәкен Мамаш әйелін жиі ұрып-соғатыны туралы ақпарат жариялады. Қазақстанның Сыртқы істер министрлігі дипломат шұғыл түрде елге шақырылатынын айтты. Кейін Карина Мамаш та БАӘ-ден қайтарылатыны белгілі болды. 2024 жылғы 28 маусымда Астана қаласының әкімшілік құқықбұзушылық істер жөніндегі мамандандырылған ауданаралық соты Сәкен Мамашқа қатысты денсаулыққа қасақана жеңіл зиян келтіру дерегі бойынша істі қарады. Сот шешімі бойынша ол кінәлі деп танылып, 15 тәулікке әкімшілік қамауға алынды.