Белсенді ұстаз Ақмарал Шатемірқызы мұғалімнің жалақысы жоғары ма деген сұраққа жауап ретінде жазба жариялады деп жазады Democrat.kz.
"Мұғалімдердің айлығын бәрі есептейді...
Ал енді бірге есептеп көрейік.
Бір жүктеме 16 сағаттан тұрады,
(24 сағаттан алатындар аз-ау).
16 сағатқа шамамен айлық 250000 мен 280000 арасы. Орта есеппен 265000 делік.
265000 теңге (таза қолға тиетіні) 
Бір жүктеме — 16 сағат.
Бұл — апталық сабақ саны.
16 сағатты 4 аптаға көбейтсек,
айына — 64 сағат шығады.
Енді 265 000 теңгені сол бір айдағы 64 сағатқа бөлейік — бір сағаттық еңбекке шамамен 4140 теңге төленеді
Ал енді сол 45 минуттық сабақта мұғалім не істейді:
– 30–35 баланың назарын баурап,
– сабақты түсіндіріп,
– тәртібін қадағалап,
– алаңдап отырғанын байқап,
– артта қалып жатқандарды ілестіріп,
– белсенділерге бағыт беріп,
— дәптерлерін тексеріп,
– бір-біріне кедергі келтірмеуін бақылап,
– сыныптың психологиялық ахуалын, эмоционалдық күйін бағалап отырады.
– Әр оқушының оқу мақсатына жетуін қамтамасыз етуге тырысады.
Мұның бәрі — бір мезетте, бір кабинетте, бір мұғалімнің жауапкершілігінде.
Мұғалімнің жұмысы қоңыраумен бірге аяқталмайды.
Күтіп тұрған дәптер тексеру, бағалау жұмыстарын құрастыру, құжат толтыру, жоба жүргізу, ата-анамен байланыс, есеп, сабаққа дайындық, апталық, пәндік олимпиадаға дайындау, біліктілік курстарына қатысу, жиналыс…
Мұғалім айлығын есептегісі келіп отыратын азаматтар, мұғалім қанша сағатпен жүр, соны сұраңыз да, шамамен 4140 теңгеге көбейтсеңіз болғаны есебіңіз дұрыс шығады.
Мұғалім де сіздер сияқты квартплата төлейді, дресс-код стильде киім киеді, косметологқа барады, киноға барады, қызықты кітаптар сатып алады, анда-санда мерекеде ресторанға барады, мүмкін шетелге шығады.
Мұғалімдердің де ипотекасы бар.
Көпшілігі айлығын айлыққа жеткізе алмай, үй алу үшін несиеге жүгінеді.
Ал сол банктердің қаржы айналымын, табысын, тіпті ісін жүргізіп отырған — дәл осы ипотека алушылар.
Яғни, қатардағы мұғалім де банк жүйесінің тұтынушысы ғана емес, жүйені ұстап тұрған негізгі қозғаушы күштің бірі.
Сондықтан «мұғалім көп алады» деп айтпас бұрын, оның айлығына қанша жауапкершілік, қанша салмақ, қанша қарыз артылып отырғанын да ойлаған жөн.
Ал енді есептей беріңіздер.
P. S. Қатарымызда қаншама білім алушының жүрегіне жол тауып, қаншама жеңімпаз шәкірт тәрбиелеп жүрген ұстаздар өте көп.
Әрбірінің артында — үнсіз еңбек, ерен қажырлық, адами жауапкершілік жатыр.
Мұғалім тек оқытпайды — жарқын болашақ қалыптастырады. Мың рақмет" деп жазды Ақмарал Шатемірқызы.
