Елде жүргенде бір сыйлас інім хабарласқан. “Астанаға қашан келесіз, бірге оқыған досымның басына үлкен қиындық туып тұр, көмегіңіз керек” деп, шырылдап.
Досы үшін жаны ауырып тұрғаны көрініп тұр. Шет жағасын сұрап ем, досының аузынан естігені болар, айтқаны: “келіншегінің мінезі өте нашар болған екен, анасын қатты ренжітіп, жылатып, тіпті қол көтерген екен.
Содан досым ашумен бір - екі рет салып қалған ба, сондай. Бірақ Бишімбаев сияқты жауыздық көрсетпеген. Сонда ұрыстардың бірінде келіншегі өзіне қол салып, асылып қапты..”-деді..Денем дір ете қалды..
Астанаға келгесін де, “жолығайық, сізді күтіп жүрміз” деп, қоймағасын, жолығып, әйелі асылып өлген жігітті тыңдадым.
Тыңдап отырып, ішкі интуицияммен оқиғанын дәл олай болмағанын ұғындым. Қазақша айтқанда, ішімді тартып қалдым. “Қыз болмай келгенін білсем де, соның абыройын ойлап, ешкімге білдірмедім”-дегенде, айтарға сөз де таппай, біраз аңырып қалдым. Маған шыққан досы да ыңғайсызданып кетті, сол кезде. Келіншегімен арада ұрыс-керістің көп болғанын айтты.
- Айналайын-ау, әркімнің көзқарасы әр түрлі. Егер өзің некеге дейін тазалықты сақтауға қатты мән беретін адам болсаң, үйленер алдын сырласқанда, неге сұрамадың? Түрлі тағдыр бар, өмірде. Түрлі жағдай бар.
Оған түсіністікпен қарап, сол адамды сүйсе, бәріне көз жұмып, өмір сүріп жатқандар қаншама. Ал солай болды екен, екі баланы неге тапқыздың?
Айрылысып кетпедің бе, басында? Егер дәл сол жағдай сенің көңіліңе үнемі күдік туғызып, үнемі жанжал тууына себеп болған болса, басында нүктесін қою керек еді. Өз теңін табар еді ғой, ол да, сен де-дедім, ақырында шыдамай..
- Жоқ, ұрыс-керіс ол үшін болмайтын. Шешесімен күнде видеомен сағаттап сөйлесетін.-деп, далбасалады.
- Ол ұрсуға себеп пе? Сенің сөйлесуге уақытың болмағасын, сырласатын адам іздеген шығар.
- …
- Өзіне қол салардан алдын не жағдай болып еді?
- Ұрсып қалғанбыз, тағы..әкесіне звондап, “қыздарыңды алып кетіңдер, тұрмаймын”-дедім..Сосын жынданып, өзімнің әке-шешеме звондап, “ажырасам, мұндай әйелмен тұра алмаймын” -дедім.
- Екі баланың жастары қаншада?
- 3-те және 1.5-да.
- Екі баланың әкесі, үйдің азаматы, дардай еркекке әйелімен ұрысса, әке-шешесіне шағым айтып, тел.соғу намыс емес пе?..
- ….(тағы үнсіздік)
- Кім көрді, асылып қалғанын?-деп сұрадым.
- Інім. Екі баланың жылағандарынан оянса, әйелім ваннада асылып қапты, балалар аяғын құшақтап, “мамалап” жылап тұр екен..
Денем емес, бұл жолы жүрегім дір ете қалды..
- Мынау соңғы жазғаны. Мен жынданып жүріп, үйден кетіп қалғам, ұрыстан кейін. Содан оқыған да жоқпын.
“Жынданғышын өзінің, нервный әйтеуір, шетінен”-дедім, іштей.
“Мамаң маған баламды сорлатып отырған қатынсың, қарғаймын сені деді. Мен өлсем, бақытты болатын шығарсыңдар, бәрің”-депті күйеуіне ең соңғы жазғанында..Жүректі тағы ауырлық басып кетті..Жасы небары 28-де екен..
Содан тергеуге тағы шақырғанға дейін хабарласатын боп, кеттім. Ары қарай отыра беруге басым шыңылдап кетті.
Содан бері бірнеше күн өтті, басымды бүгін көтердім, сенесіздер ме?..Ауырып қалдым, кәдімгідей. Ана энергетиканы айта алмаймын, сұмдық ауыр энергетика.. Ықылас, Фалақ, Нас сүрелерін оқып, тұзға шомылып, Бақара сүресін тыңдап, әзер өзіме келдім. Кеше істен бас тарттым. Досы жақсы жігіт еді, апалап тұратын. Соның көңілін жыға алмай, нақақ күйіп бара жатса, жәрдем береміз бе дегем ғой. Құрысын, өз күнәларын өздері көтерсін дедім. Суицид оңай нәрсе емес қой. Аруағы кетпей жүр ме, жаны тынышталмай жатыр ма, сорлы келіншектің.. Ана жігіт те келіншегінің атын айтып, өзімен-өзі сөйлесетін бопты..
Осындай оқиғаларды естігенде, қатты қорқам, шын айтсам..Ата-ананың балаларының өміріне орынсыз араласып, есеюге жол бермейтінінен майда-шүйдеге дейін әке-шешесіне есеп беріп отыратын боркемік еркектер, неше түрлі данышпан, өмірді қалай сүруді үйрететін ақыл айтқыш коучтардың ықпалынан психикалық күйзеліске тез түсетін әлсіз әйелдер көбейіп кетті ме деп те ойлап қоям..
Не жағдай болса да, эгосын жеңіп, ең алдымен балаларын ойлау керек емес пе еді?..Ұрып-соғып өлтірсе, әрине еркек біржақты кінәлі. Бұл жерде ұрсып қалып, өзіне қол салып отыр. Енесі мен шешесі де араласа берген сияқты, жас отбасының өміріне..Әйтеуір жауапсыз сұрақтар көп, көкейде...
Ләззат АХАТОВА, адвокат.
