Қазақстан полициясы Украина, Албания, АҚШ және халықаралық құқық қорғау құрылымдарымен бірге адамдарды жалған жұмыс ұсыныстары арқылы есірткі бизнесіне тартқан трансұлттық желіні әшкереледі. Қылмыстық жұмыстан бас тартуға тырысқан адамдарды ұрып-соғып, заңсыз ұстап отырған жағдайлар да анықталған, деп жазады Democrat.kz.
Арнайы операция бір жылдан астам уақыт жүргізілген.
Қазақстан ІІМ мәліметінше, адамдарға бастапқыда заңды жұмыс ұсынылған. Олар call-орталық операторлары, HR-менеджерлер, химиктер, курьерлер, логистер немесе қойма қызметкерлері ретінде жұмысқа шақырылған.
Алайда кейін азаматтарды есірткі желісінің жұмысына тартқан.
Қылмыстық топтан кеткісі келген адамдарға айыппұл салынып, кейбірін ұрып-соғып, еркінен тыс ұстаған жағдайлар болған.
Операция Қазақстан мен Украина прокуратураларының, Украина және Албания полициясының, Интерпол мен АҚШ-тың есірткіге қарсы күрес басқармасының қатысуымен жүргізілген.
Украина аумағында жүргізілген тінтулер барысында компьютерлер, байланыс құралдары, ақша және қылмыстық схемаға қатысты басқа да дәлелдер тәркіленді.
Тергеу жалғасып жатыр.
