Келіннің иіліп сәлем салуына тыйым салған дұрыс па, әлде келіннің сәлем салуын талап еткен жөн бе?

05 маусым 2025

904

Мақаланы бөлісу
Келіннің иіліп сәлем салуына тыйым салған дұрыс па, әлде келіннің сәлем салуын талап еткен жөн бе?

Танымал кәсіпкер Марат Толыбай тағы бір жазба жариялап, жұртты қызу пікірталасқа түсірді деп жазады Democrat.kz.

"Қазақтың кейбір отбасыларында «Сәлем беру» дәстүрі әлі күнге сақталған. Бұл дәстүр бойынша жас келін күйеуінің үйінде әр таңда оның туыстарына терең иіліп сәлем береді. Олар оған бата береді, яғни оған, күйеуіне денсаулық, бала сүю және тағы басқа жақсы тілектер айтады. Бір қарағанда, бұл жақсы, ізгі дәстүр сияқты көрінеді. Бірақ көпшілік бұл дәстүрде әйелдерге қатысты кемсітушіліктің бар екенін түсінбейді. Себебі ер адам үйленгеннен кейін қалыңдықтың ата-анасына кездескен сайын иіліп сәлем бермейді, ал келінге бірден көп талап қойылады: орамал тағу, барлық туыстарға иіліп сәлем беру, әңгімеге араласпау, кішіпейіл болу. Менің ойымша, біржақты иіліп сәлем беру әрекетінде бағынудың символы жатыр. Бұл арқылы келінге: сен мұнда толық тең емессің, отбасының толыққанды мүшесі емессің, сен бізге иіліп, бағынуың керек дегенді ұғындырады. Бәлкім, бұл дәстүр пайда болған ежелгі заманда келіннің мұндай жағдайы ақталуы мүмкін еді. Қазақтар ұзақ қашықтыққа көшіп-қонып жүргенде, келін күйеуінің отбасына кетіп, олардан оңай шыға алмайтын. Ол жаңа туыстардың қолында болып, оларға толық тәуелді еді. Бірақ қазіргі заманда, инфрақұрылым дамыған, адамдар еркін қозғала алатын, ең бастысы, біз өркениетті болуға ұмтылып, ерлер мен әйелдердің теңдігін жариялап жатқан кезде, әйелдің теңсіздігін, оның отбасы мен қоғамдағы рөлін төмендететін кез келген дәстүр бізді артқа, орта ғасырларға тартады. Дәл осыдан кейін тұрмыстық зорлық-зомбылық, отбасылық тирания сияқты құбылыстар тамыр алады. Мұндай құбылыстармен күресуіміз керек" деп жазды Марат Толыбай. Кәсіпкердің бұл жазбасына қатысты "келін - үлкенге құрмет үшін иіліп сәлем береді" деген сыңайда пікір жазғандар келіннің сәлем салуына тиіспеуді сұрауда. Жалпы, келіннің иіліп сәлем салуы - қоғамдық маңызы бар басты мәселе ме? Келін сәлем салмай-ақ қойса не болады? Келіннің сәлем салуына түбегейлі тыйым салса, не болады? Болмаса келінге сәлем салуды қатаң талап етіп қойсақ не болады? Бір нәрсе өзгере ме, сіз қалай ойлайсыз? Фото көрнекілік үшін.  
Барлық жаңалықтар