Белсенді ұстаз Тілекқабыл Нұрышов Оқу ағарту министрі Жұлдыз Сүлейменованың "мектеп директорын екі жылға тағайындау" туралы пікіріне қатысты өз ойын білдірді деп жазады Democrat.kz.
"Жұлдыз Сүлейменова ханымның, мектеп басшыларын 2 (екі) оқу жылына тағайындалатыны, жұмыс жақсы атқарылса, тағы 2 (екі) оқу жылына мүмкіндік берілетіні туралы мәлімдемесі қоғамда қызу талқыланып жатыр екен.
Өз пікірімді, төмендегідей фактілермен негіздейін: БҚО Білім Басқармасына қарасты Орал Қаласының Білім бөліміне қарасты А.Байтұрсынов ат N10 -мектепке жаңа басшы тағайындалғанына 2 (екі) жылға жуық уақыт өтті. 14 (он төрт) жылға жуық бір басшы басқарған кезде болмаған жетістікке жетті. Жалпы білім беретін пәндерден оздырылатын олимпиаданың қалалық кезеңінде командалық үшінші орынға ие болды. Бұл үлкен еңбектің нәтижесі.
Басшысы Толқын Жасталаповна "Білім берудегі өзгерістің 1000 көшбасшысы" жобасының түлегі. Сондай-ақ, тура осындай білім сапасы жақсарған мектептердің қатарына Ә.Молдағұлова N38 - мектепті де айтуға болады.
Басшысы Акштап Суюнгалиева ал, ротацияның нәтижесінде келген 2 (екі) жылда Алтын Жумагалиева ханым, N37 -мектепті республиканың "100 үздік мектебі" қатарына қосып, осы оқу жылында жалпы білім беретін пәндер бойынша республикалық олимпиаданың қалалық кезеңінде командалық есепте 3 (үшінші) орынды иеленді.
Осыған дейін 10 (он) жылдай бір басшы отырған кезде, N37-мектепте оң өзгеріс болмап еді.
Бұл тізімді онан әрмен жалғастыра беруге болады. Аталған мектептерде тек қана пәндік олимпиада емес, жалпы білім сапасы, сапалық құрамның өсуі, материалдық -техникалық базасының жақсаруы байқалады.
Ешкімнің жеке басында шаруам жоқ. Лауазымдық міндетті әркім, әртүрлі атқаратынының көрінісі деп қабылдауларыңызды сұраймын.
Сондықтан, министрдің бастамасын қолдаған орынды болар еді. Тек бұл жоба ротация сияқты қала мектептерін (бір елді-мекен) емес, ауыл мектептерін қамтыса да жақсы болар еді.
Әрине, әр жобаның жақсы және кемшін тұстары болар сөзсіз. Дегенмен, жұрнақты жақсылыққа қоялық. Білім саласы оң өзгерістерге толы болғай", дейді Тілекқабыл Нұрышов.
