"Бір күнде екі түрлі ақпарат естіген жалғыз мен емес шығармын" деген танымал, білікті педагог Мира Барказатқызы мұғалімдер арасында қызу талқыланып жатқан "аттестация жаңалығына" қатысты пікір білдірді деп жазады Democrat.kz.
"Оқу ағарту министрі “Президенттің ұсынысымен тоқтатылды” деді. Ал бірінші вице министр Меделбекова ханым “…уақытша тоқтатылды” деген хат жолдады.
Президент тапсырса да тоқтатылмайтынын, соңғы “уақытша тоқтатылды” айқындап тұр. Елімізде Президенттен басқа шенеуніктер тек креслода отыра ма, айтылғанды бұрмалап, айтпаса жұмыс жасамай ма?
… Аттестацияның ОЗП-дан басқа да машақаты көп екенін білетін шығарсыздар. Кейбіріне тоқтала кетейін:
1 ) авторлық бағдарламаны өзің жазсаң сараптамалық комиссия өткізбейді, сатып алғандарға 100-150 мың теңге деген жарнама толып жүр, сатып алғандар тез өтеді.
2) портфолионы өзің жасайсың, бірақ жасамай-ақ әр деңгейден комиссияның бонусын береп өтіп кететіндер бар. Деңгей өскен сайын бонус та өсе береді. Өсіп-өсіп 150 000-ға барады.
3) тест тапсырсаң 1-2 балл жетпей қалады,ал берсең, өтесің, тесті жасап бер деп уатсабыңа жіберетін “жалмауыздар” бар, ұялмайды. Талайын ұстап берсең де, былқ етпейді. Солар өтеді. Біреудің пайда көзі.
Төменгі категория 450 000-нан басталып,ең жоғарғысы 800 000-ға барады деген ұзынқұлақтың сөзі бар. Сол бергендер өтеді.
4) біліміңді көтересің,тегіні бар. Ақылысы қазір ашық заңдастырылған 22 000-нан басталады, көбі қашып-пысып ақылыға барады.
5)Портфолиоға керекті марапат алу үлкен мәселе.Мұғалімдер біледі, әр мақала 5000- 6 000-нан басталып 12000-ға дейін барады.
6)Портфолионың құжаттарын шығару мен оны бір жерге жүктеу одан да қиын. Ақша керек.
600000 -ға жуық мұғалімнің 20%-ы өз күшімен, еңбекпен өтсе, қалғанын есептеп көріңіз. Сатып алғандардың сабағынан іліп алар дүние таппайсың, оны да жасатып алады. Жасап бергеніңді шайнап жұта алмайды.
Мұғалімнің деңгейін солай анықтайтын аттестация керек пе? Адалдық өздеріңде жоқ болса, мұғалімді әурелемеңдер!", деді Мира Барказатқызы.
