Елмира есімді мұғалім сыныбындағы оқушыларының аналары мазалап, ақша сұрайтынын айтып, реніш білдірді деп жазады Democrat.kz.
Елмира атты мұғалім әлеуметтік желідегі парақшасында ағынан жарылып, өзін мазалаған мәселені жариялады.
"Бұрын ұялып, сыпайы жауап беретінмін. Бірақ бүгін нүкте қоюды жөн көрдім. «Бұдан кейін менен ақша сұрамауыңызды өтінемін» деп жаздым.
Иә, қатал көрінуі мүмкін, бірақ өз шекараңды қорғамасаң, басқалар оны таптай береді. Мені таңғалдыратыны: 1. Уақыт: Түнгі сағат он бірге таяу. 2. Жақындық: Біз дос емеспіз, тек баласы менің оқушым. 3. Жүйелілік: Бұл «әдетке» айналып бара жатыр"деп қынжылған мұғалім чаттағы смстерді жариялады.
Мұғалімнің бұл жазбасына қатысты әріптестері таңданыстарын жасырмады. Тіпті, кейбірі оқушының шешесінің мынадай әдепсіздігіне қатты реніш білдіруде. "Енді апайдан ақша сұрау қалып еді. Ұят қайда", "жақында ата-аналар мұғалімді есек етіп, мінеді", "мынау тіпті әдепсіздік, сауатсыздық" дегенге саятын пікір жазуда жұрт.
Дайындаған Мәриям КЕНЕСАРЫ.
