Денсаулық сақтау министрлігі жүргізуші куәлігін алатын азаматтарды медициналық тексеру тәртібін өзгертуді ұсынды. Дәрігерлердің көлік басқаруға рұқсат беруі немесе денсаулық бойынша қарсы көрсетілім анықтауы автоматты түрде бірыңғай базаға жіберілмек, деп жазады Democrat.kz.
Тиісті түзету жобасы «Ашық НҚА» порталында жарияланды.
Жобаға сәйкес, жүргізушілердің медициналық тексеру нәтижелері бірыңғай автоматтандырылған ақпараттық базаға енгізіледі.
Дәрігер адамның көлік басқаруына медициналық рұқсат берген жағдайда бұл ақпарат жүйеге автоматты түрде түседі.
Денсаулығына байланысты көлік жүргізуге қарсы көрсетілім расталса, ол туралы мәлімет те сол базаға жіберіледі.
Бұл қағаз анықтамаларды қолдануды азайтып, жүргізушінің денсаулық жағдайы туралы ақпаратты мемлекеттік органдар арасында жылдам алмасуға мүмкіндік береді.
Құжат әзірге жоба күйінде. Сондықтан ұсынылған тәртіп түпкілікті бекітілген норма емес.
