Шымкенттік тәжірибелі ұстаз Майра Галиева әлеуметтік желіде мектептегі жұмысын қайта рәсімдеуге байланысты түсініксіз жағдайға тап болғанын мәлімдеді. Педагогтің айтуынша, оған электрондық платформа арқылы жұмысқа қайта қабылдануға келісім беру ұсынылып, бас тартқан жағдайда 0,25 сағаттық зерттеу-шығармашылық жүктемесі қысқаруы мүмкін екені ескертілген, деп жазады Democrat.kz.
Шымкент қаласындағы №2 мамандандырылған үш тілде оқытатын мектеп-интернаттың қазақ тілі мен әдебиеті пәнінің мұғалімі Майра Галиева әлеуметтік желіде жұмысқа қабылдау рәсіміне қатысты мәселе көтерді.
Ұстаздың жазуынша, 27 қыркүйекте оның телефонына 1414 нөмірінен SMS келген. Хабарламада белгілі бір цифрды жіберу сұралған. Кейін мектеп өкілі электрондық цифрлық қолтаңбасын беруді сұрағанын, алайда ол ЭЦҚ-сын беруден бас тартқанын айтады.
Галиеваның сөзінше, одан кейін «Сана» платформасында 0,25 зерттеу-шығармашылық сағатын тіркеу қажеттігі түсіндірілген. Педагог қажетті құжаттарын жібергенін, бірақ жүйенің біраз уақыт жұмыс істемей қалғанын жазады.
Келесі күні ұстазға қайта хабарласып, құжатқа жылдам қол қою керектігі айтылған.
Майра Галиева өзінің жеке кабинетіне кірген кезде «Ашық еңбекке орналастыру платформасы» арқылы құжаттары жүктеліп, жұмысқа қабылдануға келісім беру жөніндегі батырма пайда болғанын көргенін айтады.
Осы тұста педагог қарсылық білдірген.
Оның сөзінше, өзі аталған мектепте бұрыннан жұмыс істеп жүргендіктен, неге қайтадан жұмысқа қабылданып, жаңа келісім рәсімдеуге тиіс екенін сұраған.
«Неге жұмысқа қайта тұрып, қайта келісімшарт жасауым керек?» деген сауалына нақты жауап ала алмағанын жазады ұстаз.
Галиеваның мәлімдеуінше, мектеп әкімшілігі одан құжатқа қол қоюды бірнеше рет сұраған. Ал қол қоймаған жағдайда 0,25 зерттеу-шығармашылық сағаты қысқаруы мүмкін екені айтылған.
Педагог мұны қысым ретінде қабылдап отырғанын жеткізді.
Мәселенің тағы бір маңызды жағы бар.
2026 жылғы тамызда мемлекеттік мектептерге педагогтерді қабылдау тәртібі жаңартылған. Қолданыстағы қағида бойынша орта білім беру ұйымдарындағы педагог лауазымына тағайындау конкурсы «Педагогті жұмысқа қабылдау» электрондық модулі арқылы жүзеге асуға тиіс.
Ал Шымкентте бұған дейін педагогтердің бос жұмыс орындарын анықтау мақсатында «Қарқын» жобасы аясындағы «Сана» платформасы қолданылған.
Алайда Майра Галиева көтеріп отырған мәселе жаңа қызметкерді қабылдау емес, бұрыннан жұмыс істеп жүрген педагогтің еңбек қатынасын қайта рәсімдеу төңірегінде болып отыр.
Сондықтан бірнеше сұрақ ашық қалып отыр: бұрыннан еңбек шарты бар педагог не үшін қайтадан «жұмысқа қабылдануға» келісім беруі керек? 0,25 зерттеу-шығармашылық жүктемесін сақтау электрондық платформадағы жаңа рәсімге тәуелді ме? Педагог құжатқа қол қоюдан бас тартқан жағдайда оның сағатын қысқартуға заңдық негіз бар ма?
Майра Галиева — білім саласында ұзақ жыл еңбек етіп келе жатқан тәжірибелі педагог. Ашық деректерде оның шебер-педагог екені, Ыбырай Алтынсарин атындағы медаль иегері екені және республикалық кәсіби байқауларға қатысқаны көрсетілген.
Ұстаз өзінің жазбасында еңбек заңнамасын білетінін айтып, мәселенің заңдылығын анықтауды талап еткен.
Қазірше Майра Галиеваның әлеуметтік желіде айтқан «қол қоймаса, сағат қысқарады» деген мәлімдемесіне мектеп әкімшілігінің немесе Шымкент қаласы білім басқармасының ресми түсініктемесі ашық дереккөздерден табылған жоқ.
