Танымал ұстаз Тілекқабыл Нұрышов шебер санатындағы кей ұстаздардың талапқа сай келмей, сүрініп жатқаны туралы айтып, Оқу ағарту министрлігіне дәл осы мәселеге қатысты өтініш жасады деп жазады Democrat.kz.
"Кешеден бері педагог - шеберлер арасында ("Үздік педагогтер" де бар) ОАМ-нің "шұғыл" қабылдауын талап еткен жазбалар көбейді. Себебі, министрлік шебер - педагог санатына көтеруге/растауға өтініш берген педагогтердің нәтижесін ватсап топтар арқылы жариялады.
Шебер санатын растауға және көтеруге өтініш бергендердің басым көпшілігі қойылған талапқа сай келмеген. Бұл заң талабы. Заңды қандай санатқа болса да өтініш берген барша педагог құрметтеу , сыйлау, бағыну керек!
Өтініш берген әр педагог талапты біледі. Өз - өзін бағалады. Енді неліктен комиссияның шешімімен келіспей отырғандары түсініксіз. Араларында "Мен, пәленше жылғы "Үздік педагогпын" деп жатырғандар да бар көрінеді-мыс.
Айналайындар-ау, үздік педагог болсаң, мемлекеттен соған сай қаражат алдың. Енді не керек дейтін біреу барма, оларға?! Басым көпшілігінің кемшілігі авторлық бағдарламалары шықпағандар, 3 (үш) облысқа таратылмағандар. Енді кімге өкпелейді?
5 жыл уақыттары болды ғой. Министр немесе президенттің қабылдауын сұраса да өздерінің Конституциялық құқықтары ғой. Бірақ, оған заңды негіз, бұлтартпайтын факт керек емес пе? Осы педагог- шеберлер қашан қоғамдық мәселені қозғап жазба жазыпты? Қашан министрлікті сынапты?
Енді жеке мүддесімен министр мені қабылда дегендеріне жөн болсын. Сонда министрдің шамамен мыңға жуық (қорғай алмаған немесе растай алмаған) педагогтің жеке мәселесімен айналысып отыруы керек пе? Неге бұл педагогтерге өңірлердегі министрліктің өкілдері - бақылау департаментінің басшылары түсінік жүргізбеске? Талап ол - талап! Заң ол - Заң!!!
Қолданыстағы заңнама талаптарын орындай алмадыңыз ба, онда "тағдырыңызға көну" керексіздер ғой. Әр педагог жеке мүддесімен министрдің қабылдауына баратын болса, өңірдегі департамент басшыларына неге салық төлеушінің есебінен еңбекақы төлеп отырмыз?!
Қазіргі бағалау жүйесіндегі ерекшелікке сәйкес, әр жиынтық бағалаудан кейін (ТЖБ, БЖБ) оқушылар өздерінің алған бағаларына разы еместігін айтатын жәйттер көп болады.
Оқушыға жұмысын көрсетіп, талдап берген соң, өзінің қателігін түсінеді. Ал, педагог-шеберге талапқа сай еместігін министрдің өзі түсіндіруі керек болып тұр ғой. МАСҚАРА емес пе...
Биылғы педагог - шебер санатын қорғап жатырғандар 5 (бес) жыл бұрын білім басқармалары арқылы алғандар ғой. Сондықтан, қоғамда кім болса, сол шебер алды деген сын болғаны рас. Оны кешегі шыққан қорытынды дәлелдеді.
Санат 5 (бес) жылға ғана берілетінін ұмытпайық әріптестер! Өмір бойына емес! Талапты орындамасаңыз неменеге намыстанасыздар?! Педагог - зерттеуші, педагог -сарапшы санаттары да жақсы емес пе?
"Шебер" педагогтер өздерін өзге әріптестерінен жоғары қоятындары да баршылық, ол да орынсыз. Осы 5 (бес) жылда талапты орындай алмай, санатыңыз төмендесе, бұл - ақырзаман емес!
Сіздерде әлі уақыт бар, келесі бес жылдықта талапты орындап, қайта шебер санатын ала аласыз. Сондықтан, желіні пайдаланып, министрге қысым жасауларыңыз негізсіз. Педагог - зерттеуші санатына 5 (бес) балл жетпей, қайтадан сарапшы санатында қалған бір әріптес хабарласты.
Екеуміз Білім басқармасына барып, Ақжарқын Темірханова ханыммен кездестік. Бағалау парағын көрсетіп, түсіндірді. Әріптес түсінді. Шеберлер сияқты "шу шығарамын" деген жоқ.
Әр педагогте тек мамандықтың дипломы ғана емес, адамға тән парасаттылық пен адамгершілік, қарапайым түсінік болғаны дұрыс-ау.
Оқу ағарту министрлігі, "Педагог - шебер санатына қатысты, шығарған шешімдеріңізді өзгертпеңіздер! Дұрыс шешім. "Айқай шығарғандарға" санатты қайта берсеңіздер педагогтерде мәртебе болмайды.
Құрметті Жұлдыз Сүлейменова ханым, халық пен педагогикалық қауымдастық Сіздің әр бастамаңызды қолдап отыр. Сондықтан, бұл мәселеде тек қана Заңның үстемдік етуін қамтамасыз етеді деп сенім артамын" деп жазды Тілекқабыл Нұрышов.
