"Мектеп директорларын мазалай бермейік" деген қоғам белсендісі, блогер Сафуан Жолай білім саласына қатысты өз пікірін білдірді деп жазады Democrat.kz.
Сафуан Жолай өз ұсынысында: "Тиімді вариант: 5+5...
Аймағамбетов министр кезінде басталған мектеп директорларын ротациялау оң нәтиже берген жоқ.
Керісінше, бір мектепті былықтырған директор екінші мектепке ауысып, жауапкершіліктен құтылып кетуге мүмкіндік алды.
Содан екінші мектепті былықтыру жалғасты...
Сондықтан, мектеп директорларының орнын ауыстыру, тиімсіз.
Бес жыл жұмыс атқарған директордың жұмысын бағалап, жетістіктері жеткілікті болса екінші рет бес жылға тағайындау керек.
Алғашқы бес жылда нәтиже шығармаған басшы болса, оны лауазымынан босатып, екінші рет басшы болуға мүмкіндік берілмесін.
КЕЗЕКТІ МӘСЕЛЕ:
Бүгінгі күні қандай тұлғалар директор болуда?
Директорлар тағайындайтын конкурстық комиссияның жұмысын кім қадағалайды?
Көп жағдайда директор лауазымына тамыр-таныс арқылы тағайындау көрініс алып жатқандай...
ДИРЕКТОРДЫҢ ОРЫНБАСАРЫ ЛАУАЗЫМЫНА ШЕКТЕУ ҚОЮ КЕРЕК
Мектеп директорының орынбасарлары да үлкен рөл ойнайды. Әсіресе, жаңадан тағайындалған жас басшы болса, бұрыннан орынбасар лауазымын атқарып келе жатқандар басшылықты өз қолдарына алуға тырысады.
Жас басшы көнбесе, аяқтан шалып, ұжымды қарсы қоятын жағдайлар да жиі орын алуда.
Сондықтан, мектеп директордың орынбасары бес жылға тағайындалуы тиіс.
ӘР МЕКТЕПТЕ КӨШБАСШЫ ПЕДАГОГ ТАБЫЛАДЫ
Мектепте сырттан басшы келмеу керек. Басшы болатын педагог әр мектептен табылады.
Әсіресе, ауыл мектептерінде.
Мектеп директоры сол ауылдың тұрмыс-тіршілігін жақсы білетін, жергілікті тұрғын болу керек.
Жалпы айтқанда, директорларды ауыстыра бермей, білім саласындағы келеңсіздіктермен күрестің тиімді жолдарын қарастырайық.
Білім басқармалары мен білім бөлімі басшылары білікті болса, кез келген мектепті жөнге қоя алады", дейді.
