Жаңа елтаңбаға қатысты Олжас Бектенов мәлімдеме жасады
Қазақстанда мемлекеттік елтаңбаны өзгерту мәселесі бойынша сарапшылар пулы құрылуы мүмкін, деп хабарлайды Dalanews.kz.
Бұл туралы премьер-министр Олжас Бектенов мәлімдеді. Оның айтуынша, қазіргі таңда әр саладан арнайы мамандар жасақталып жатыр.
«Бүгінде Мемлекет басшысы Қасым-Жомарт Тоқаевтың Ұлттық Құрылтайда алға қойған міндеттерін жүзеге асыру бойынша кешенді іс-шаралар жоспары бекітілді.
Қазіргі таңда мемлекеттік елтаңбаны өзгерту мәселесін талқылау үшін депутаттар мен қоғам қайраткерлері, тарих, филология, археология, антропология және әлеуметтану саласының ғалымдары арасынан сарапшылар тобы жасақталып жатыр.
Барлық аспектіні объективті қарастыру үшін ортақ пікірге келсек, Мәдениет және ақпарат министрлігі жанынан комиссия құру жоспарлануда», — деді Бектенов Мәжіліс депутаттарының сауалына жауап бере отырып.
Фото ашық дереккөзден алынды.
