Бірер күн бұрын әлеуметтік желіде өздерін "педагогтар қауымдастығы" деп атап, сол қауымдастық атынан Президент Тоқаевқа ашық үндеу жолдаған азаматтарға қатысты бірнеше азамат құзырлы мекемеге өтініш түсіретіндерін мәлімдеді деп жазады Democrat.kz.
Еске салып өтейік, қарағандылық ардагер ұстаз Нұргүл Әбілдина өзінің әлеуметтік желідегі парақшасында "педагогтар қауымдастығы" атынан Президенттің атына ашық үндеу жазбасын жариялаған болатын. Ашық үндеуде Оқу ағарту министрі Жұлдыз Сүлейменованы орнынан алып тастау талап етілгенін кеше Democrat.kz. жариялаған-ды.
Осы мәселеге қатысты әлеуметтік желіде көптеген ұстаз өз наразылықтарын білдіріп, "педагогтар қауымдастығының" құрамында қандай педагогтар барын, педагог атын жамылып, министрді орнынан кетіруді талап етіп жүргендерге шүйлігуде.
Танымал белсенді ұстаз, заң ғылымдарының докторы, Қайрат Айтбаев та өз жазбасында осы мәселеге қатысты: "Министр Сүлейменова Жұлдыз Досбергенқызына ақыл айтудан аулақпын.
Егер жалған болса, авторын заң аясында жауапқа тарту қажет. Қазақта "Өзіңді аямағанда, өзге аяй ма?" деген сөз бар.
Барын салып отырған ықпалды топтың басшылары мен мүшелері кім? Үндеуді жариялап отырған автордың тұратын жерін анықтаса, "желдің қайдан соғып тұрғаны" бірден түсінікті болар еді. Оның үстіне "қауымдастыққа" кімдер кіргенін, үндеуге кімдер қол қойғанын тексеріп берсе, тапсырыс берушінің өзі-ақ анықталар еді. Ұйымдастырушы да осал емес сияқты. Қазақстанның түкпір түкпірінен жаңа үкімет жасақталарда, министр Сүлейменованы қызметінен тайдыру мақсатында жазылып жатқанына қарағанда, артында мықты күш тұр.Бүгін білдей Министрге қарсы шығып, "Президенттің тағайындауы дұрыс емес" деп айтқызып отырған адам, ертең Мемлекет Басшысына қарсы шықпасына кім кепіл?
"Жауды жақындатып, сынаудан өткізбе" демекші, ықпалды топ арандатушылықтың тәжірибесін шыңдап жатқан жоқ па? Заң үстемдігі мен тәртіп орнауы тиіс", - екенін айтады.
Қоғам белсендісі, танымал журналист Мөлдір Нұрман да аталған мәселеге байланысты "Біз білеміз бәрін жіпке тізіп жатырмыз, тергеуге тапсырамыз, шулата беретіндерді, елге тыныштық керек кезде" деген пікірін білдірді.
