Бас құда төрде отырмаса - екі жас бақытты болмай қала ма?

04 ақпан 2025

1381

Бас құда төрде отырмаса - екі жас бақытты болмай қала ма?

Малик Ораков ағам да қоймады, мен де қоймайын. Әңгіме әкесі жоқ қызды келін еткісі келмеген танысы жайында екен. Дәл сондай менің де танысым бар. Ұлы талай қызды ұнатқанында "әкесі жоқ немесе әкесі ішкіш екен"- деген. Сол ұлы сүрбойдақ, әлі жүр үйленбей. Осылай тағы біраз жүрсе оған балалы әйел де тиетініне күмәнім бар. Ол ештеңе емес, тағы бір танысым болды, келіннің әкесінің статусына қарайтын. Кіші ұлы базарда жеміс- көкөніс сататын кісінің қызын алды. "Картошка сататынмен құда болдық"- деп жүретін кекетіп. Бір құрбым бар. Дәл қазір қызын ұзатайын деп жатыр. Күйеуінен қанша жыл бұрын ажырасып кеткен, себебі наркоман. Бір сөзбен айтқанда тірі жүр деген аты болмаса өз- өзіне баяғыда рухани суицид жасап тастаған. Болмыс ретінде жоқ адам. Содан, қызды алатын құдалар жақ дін ұстанатын кісілер болса керек, шариғат бойынша әкесінің разылығы керек деп хабарласыпты. Сөйтсе ана "құда" (қыздың әкесі) айтады дейді: "Екі бала келіссе ,бауырсақ қой" - деп. Сосын қызына айтыпты: "Түркияға барып тұрайын деп жатыр екенсіңдер, ол жақта айлық жақсы шығар, маған ақша салып тұрасың ғой" - деп. Ал енді айтыңыздаршы, әкесі өліп қалған жоқ, тірі. Көшеде лағып жүр, нашаға ақша іздеп. Осындай адамның төрде отырғаны саған керек пе? Немесе төріңде отырмаса балаң мен келін бақытты болмай қала ма? Сосын күйеуі жоқ әйелдерге қыз ұзатып, келін түсіруге болмай ма? Не деген күпірлік мынау? Өзіңнің дәл ертең тірі болатыныңа кепілдік бар ма құдайдан? Бір емес екі емес, әкесі жоқ қыз туралы жаза бердіңіз ғой. Мықты болсаңыз әңгіменің төркінін еркектерге қаратып айтыңызшы. Неге отбасына еге болмай жүр, сұраңыз соны. P.S. Құрбымның қызы өте тәрбиелі. Менің келінім, менің әйелім болса екен деп армандайтын қыз! Гауһар ЖОЛМАХАНБЕТ, қоғам белсендісі. Facebook жазбасы. Фото интернеттен.