Астана әкімдігі екі аяғынан айрылған 8 жасар Алуаға көмектеседі

09 маусым 2025

474

Мақаланы бөлісу
Астана әкімдігі екі аяғынан айрылған 8 жасар Алуаға көмектеседі

ҚР Бала құқығы жөніндегі уәкіл Динара Зәкиева Астанада жол апатынан екі аяғынан айрылған қыздың үйінде болып, Алуаға көмек көрсетілетінін хабарлады, деп жазады inbusiness.kz сайты.
"Алуаның үйінде болдым. Анасымен сөйлесіп, оңалту, протоздеу туралы әңгімелестік. Кішкентай қыздың өзімен де сөйлестім. Кітап ақтардық. Аздап пицца жедік. Ол үнемі көтер дейді, далаға шыққысы келеді", – деп жазды уәкіл Instagram әлеуметтік желісіндегі парақшасында.
Динара Зәкиеваның айтуынша, Алуаның отбасына көмектесу мәселесін Астана әкімдігі жан-жақты қарастырып жатыр. Қала әкімі Жеңісбек Қасымбек үнемі байланыста. Қазір ауруханада жатқан Алуаға анасы күтім жасайды. Ол апаттан соң баласы үшін жұмыстан шығып кеткен. Анасының айтуынша, Алуа түнімен ұйықтамайды, шошып ояна береді. Автобус апаты болғанын енді есіне түсірді. Айта кетейік, 2 маусымда Астана қаласындағы Республика даңғылында жолаушы автобусы ақпараттық тақта тіреуіне соғылған. Жол апатынан 15 адам зардап шеккен. Үш жолаушы ауруханаға түсті. Дәрігерлер 8 жастағы Алуа Бекеннің екі аяғын кесуге мәжбүр болған. Астанадағы автобус апатынан кейін қылмыстық іс қозғалып, автобус жүргізушісі қамауға алынды.
Барлық жаңалықтар