Қазақстан Республикасының Оқу-ағарту министрі Жұлдыз Сүлейменова мектеп оқулықтары мен оқу-әдістемелік кешендерді шығаратын ірі отандық баспалардың басшыларымен жұмыс кездесуін өткізді деп жазады Democrat.kz.
Кездесу Мемлекет басшысы Қасым-Жомарт Тоқаевтың білім сапасын арттыруға және оқушыларды заманауи оқу материалдарымен қамтамасыз етуге бағытталған тапсырмаларын іске асыру аясында өтті.
Кездесу барысында мектеп оқулықтарын кезең-кезеңімен жаңарту, оқу әдебиетінің сапасын арттыру, сондай-ақ Оқу-ағарту министрлігі, сарапшылар қауымдастығы және баспалар арасындағы өзара іс-қимыл мәселелері талқыланды.
Оқулықтар мазмұнын өзектендіруге, олардың мемлекеттік білім беру стандарттарына және заманауи білім беру тәсілдеріне сәйкестігіне ерекше назар аударылды.
Жұлдыз Сүлейменова баспа басшыларына мектеп оқулықтарын кезең-кезеңімен жаңарту жөніндегі міндеттерді жеткізіп, жаңартылған басылымдарды дайындау және шығару мерзімдерін қатаң сақтау қажеттігін атап өтті.
Министр сондай-ақ Қазақстан Республикасы Премьер-Министрінің орынбасары Аида Балаева бұған дейін жариялаған қолданыстағы мектеп оқулықтарын талдау нәтижелеріне назар аударды. Аталған талдау бойынша әртүрлі сипаттағы 700-ден астам ескерту мен қате анықталған. Оқулықтарды жаңарту оқу материалдарының сапасын арттыруға, олардың мемлекеттік білім беру стандарттарына және заманауи білім беру талаптарына сәйкестігін қамтамасыз етуге бағытталғаны атап өтілді.
Сонымен қатар Жұлдыз Сүлейменова Қазақстан Республикасы Премьер-Министрінің орынбасары, мәдениет және ақпарат министрі Аида Балаева бұған дейін жариялаған білім беру ұйымдарын жаңартылған оқулықтармен қамтамасыз ету кестесіне назар аударды. Атап айтқанда, жаңартылған оқулықтар 3 және 7-сыныптар үшін 2026 жылғы 30 тамызға дейін, 4 және 9-сыныптар үшін 2027 жылғы 1 қаңтарға дейін, 8-сыныптар үшін 2027 жылғы 1 сәуірге дейін жеткізілуі тиіс.
Кездесу қорытындысы бойынша тараптар білім беру ұйымдарына арналған жаңартылған оқу басылымдарын уақтылы дайындау және шығару жөніндегі бірлескен жұмысты одан әрі жалғастыруға дайын екенін растады.
