«Балиғат жастағы қыз орамалмен жүруі керек» дейді бас мүфти

ҚМДБ төрағасы, Бас мүфти Наурызбай Тағанұлы парламент палаталарының бірлескен отырысында никабқа қатысты жеке пікірін білдірді, деп хабарлайды Azattyq Rýhy.

«ҚМДБ — ислам дінін насихаттаушы орталық. Никаб деп бетті тұмашалайтын киімді айтады. Біз оған қатысты мәлімдеме жасаған едік. Шариғат никабты міндеттемейді. Біз оны осыған дейін де айттық. Оны заң бойынша қалай реттейтіні бізге қатысты емес.

Біз өз насихатымызды жүргіздік. ҚМДБ халыққа түсіндіру жұмыстарын жүргізеді. Халықтың пайдасына шыққан кез  келген заңға біз бағынамыз. Балиғат жастағы, Аллаға сенген кез келген қыз баланың орамалмен жүруін шариғат міндеттеген.

Сондықтан балиғат жастағы қыз бала орамалмен жүруі керек. Біз оны осыған дейін де айттық. Намаз оқитын қыз бала орамалмен жүргісі келеді. Оның құқығы неге шектелуі керек?», — дейді Бас мүфти.

Еске салсақ, осыған дейін оқу-ағарту министрі Ғани Бейсембаев мектеп оқушылары мектеп формасы кию керек деген болатын. Министр Конституцияда еліміз зайырлы болып саналғандықтан, мектеп те зайырлы болуы керегін алға тартқан еді.

Фото интернеттен алынды.