Елдің іргетасын күйретуге жан-жақтан жабылып жатқан күштер көбейді

Қазақстанға қарсы идеологиялық соғыс ашылған сыңайлы. Және бір майдан емес. Халықтың санасына екі тараптан шабуыл өрши түсті. Бұл тенденцияны тек көрсоқыр ғана байқамайды.

Қай әлеуметтік желіні ашып қалсаң да, бір жағынан Ресейді әлемді құтқарушы ел ретінде көрсетіп, Қазақстанның Ресейсіз күні қараң, қазақ тілі мешеу қалған тіл, орыс тілін екінші мем.тіл қылу керек және жалпы Қазақстан, есі барда Ресеймен одақтасуы қажет деген сыңайлы видео мен посттар өріп жүр.

Екінші жағынан біраздан бері үнсіз қалған салаф-иттер, вахаб-иттер сияқты экстремистік бағыттағы ұйымдар қайтадан бас көтере бастады.

«Домбыра харам», «Ораза айында Наурыз мерекесін ысырып қою керек» деп еліргендері бұл шабуылдың басы ғана. Ал кешегі Атыраудағы қыздардың Қазақстанның туын араб әріптерімен шатпақтап шыққандары сондай идеологияның қауіпті салдары.

Менің байқағаным, бұл екі ақпараттық ағынның бір ортақ ұқсастығы бар. Әсіре діншілдікті насихаттайтындардың да, Ресейге қосылуға үгіттейтіндердің де видео авторлары бұрынғыдай желіккен немесе еріккен есуастар емес.

Тыңғылықты дайындалған, әрбір сөзі өлшеп пішілген видео-посттар. Аргументтері де баршылық. Кереметтей қазықтай қағылған түйіндер деуге келмейді, әрине.

Алайда, екі ойлы болып жүрген, өмірде өз позициясы мен орнын анықтай алмаған жандардың санасын улауға жеткілікті дәрежеде.

Және ең қауіптісі, мұндай материалдар саны әлеуметтік желіде еселеп көбейді. Соған қарап бұл мақсатты түрде ұйымдастырылып отырған шабуыл демеске амалың жоқ.

Сондықтан, бұл акцияларды мемлекетке, еліміздің тәуелсіздігіне жасалған диверсиялық әрекет деп қарауымыз керек және соған сәйкес шара қолдану қажет.

Олай болмайтын болса, ертеңгі күні еліміздің елдігіне қауіп төнері анық. Мемлекет ыдырардың алдында халық бытырайды.

Мұхтар ТҮМЕНБАЙ, қоғам белсендісі.

Facebook жазбасы.

Фото көрнекілік үшін.