Ерке мен Раймды балаларға үлгі ету дұрыс па?
Әлеуметтік желіде ой саларлық жазбаларымен танымал Гауһар Жолмаханбет бала тәрбиесіне қатысты маңызды жазбасымен бөлісті деп жазады Democrat.kz.
«Ерке Есмаханның сторизынан мына бір нәрсені көріп күйіп кеттім. Мектепте әлдебір іс-шара өтіп жатқаны белгілі. Мүмкін «Күзгі бал» шығар.
Енді дәл мектепте, әлі оң -солын танымаған балаларға Райм мен Еркені әкеліп неге идеал жасап отыр? Бала бала қалпымен өсуі керек емес пе? Мұғалімдер балаға үлгі қылатын тұлға таппай қалып па?
Дәл осы кезде біздің қоғамға идеалдар ауадай қажет екенін тағы бір еске салып өткім келіп тұр.
Адам өзге тіршілік иесіндей емес жан-жағына қарап өседі. Жануарға бәрібір. Кіммін, қайдан келдім, кімге ұқсауым керек деп бас қатырмайды.
Ал адам әманда қоршаған ортаға тәуелді. Біреуге еліктемей, қызықпай өмір сүре алмайды. Солай дүниетанымын қалыптастырады. Есі дұрыс пенде елеусіз қалудан қорқады, өзін БАР сезінгісі келеді.
Ал енді еліктейтін ТҰЛҒА қандай болуы керек? Мәселе осы жерде.
Егер дұрыс идеал таппаса еліктегіш адам өзге соқпаққа түсіп кетуі оп-оңай!
Ондай көзсіз еліктеудің зардабын тартқандар да жетерлік.
Мен балаға осыны жасап отырған мектеп пен мұғалімдеріне шара қолданса қуанар едім.
Кіп-кішкентай балаға әлден тобырлық сананы қалыптастырып беріп жатқанын өздері біле ме? Жалған идеалдардан құтылатын кез келді!» деп жазды Гауһар Жолмаханбет.
Мектеп жасындағы балаға Ерке мен Райм үлгі боларлық тұлғалар ма? Сіз бұған не айтасыз, құрметті оқырман?
Фото көрнекілік үшін интернеттен алынды.
