Кей имамдар ораза бұзатын әңгімелер айтады

Алдыңғы күні қайын сіңілімнің отбасы қайтыс болған атасының туған күнінде ауызашар беріп, Құран оқытты. Мейрамханаға бардық. Құс сүтінен басқасының бәрі бар, сірескен дастархан. Жайғастық, оқылған батадан соң бет сипап, ауыз аштық.

Имам менің баламмен қатарлас жас жігіт екен. Үйленбегені түрінен байқалып тұр. Әдетте мен оқылып жатқан Құранның мәтінін, оның айтылу ырғағын мұқият тыңдап отырам.

Әр дыбыстың дұрыс айтылуына мән берем. Кей жерлерде молдалар өтірік оқи салады. Ішімнен оның деңгейін анықтап қоям. Мұнда діни білім алғандығы көрініп тұр, жақсы оқыды.

Алдымызға келген жеңіл сорпаны ішіп тауыса бергенімізде имам микрофонды ұстап, ортаға шықты. “Аузымызды ашып, ішімізге ас барып, жүрек жалғап алдық. Енді кішкене уағыз тыңдай отырыңыздар” деді. Бәріміз басымызды көтеріп, назар аудара қойдық.

Менің есту функциямды өшіріп тастайтын қасиетім бар. Маған қажеті жоқ ақпаратты естігім келмесе, өшіріп тастаймын. Ол банкте істеген жылдары қалыптасқан әдет. Бұл жолы өшірмедім. Мұқият тыңдап отырмын.

… баяғыда пәленше деген Пайғамбардың әйелі қайтыс болыпты. Сонда ол өзін тоқтата алмай, қатты жылапты. “Әй, сонша жылағаның не?” деп сұрағандарға, “ол сондай керемет әйел еді. Мен сырттан келгенде шымылдықты ашып күтіп отырушы еді (не шымылдық екенін ұқпадым). Жаным, өзім-ақ ашар едім ғой десем, жоқ, Азаматым, сіздің еңкейіп шымылдық ашуыңызға жол бермеймін. Мен тұрғанда, сіз басыңызды төмен имеуіңіз керек дейтін” депті. Міне, көрдіңіздер ме, әйелі ерінің қадір-қасиетін қандай деңгейде жоғары бағалаған?! Ол анамыз сөзсіз жаннатта. Өйткені, ол осы дүниеде күйеуінің разылығын алып кетті…

Мынаны естіп отырып, аяқ-астынан феминистік мінезім оянып кетті. Бұдан бөлек тағы да сондай бірдеңелерді былжырады. Мынау аузынан ана сүті кеппеген боқмұрынның ми-шатпағын тыңдағым келмей, есту функциямды өшіріп тастадым.

Бұл молдалардың қатыннан басқа және сол қатынның еркегіне жасайтын қызметінен басқа әңгімесі жоқ па?! Қай жерде тыңдамасаң да, “әйел күйеуіне өйту керек, мынадай қызмет қылу керек, сонда ғана Алланың разылығын алады” дейт те жатады.

Ал, қатынына қорлық көрсететін, бала-шағасына зорлық-зомбылық жасайтын еркек туралы хадис неге жоқ, а?! Болса да, неге олар жиі айтылмайды?!

Өмірге қыз боп келгеніміз үшін өмірден түңілдіріп жіберетін осындай дүниелерді естісем, не көрсем, автоматты түрде зығырданым қайнап, нервім ауырып кететін болыпты. Еркектерге жүктелген сан-алуан жауапкершілікті қаншама көп еркек атқармай жүрсе де, олар керемет. Өйткені ол “еркек”. Ёпрст!!! Қарадан қарап, оразамды бұзады ғой!

Егерәки, имам еркек емес, әйел болса, не сол әйел- имам мен болсам, мен мынадай уағыз-ертегі айтар ем, “баяғыда Пәленшегүл анамыз түйесіне мініп алып, Сахараның шөлінде гөләйттәп келе жатса, алдынан қатынын, бала-шағасымен сабап, үйінен қуып, қаңғыртып жіберіп, алимент төлемей отырған бір бейбақ шығыпты.

Содан ананы көрген Анамыз зығырданы қайнап, түйесімен қуып жетіп, арқасынан қамшымен осып-осып жіберген екен. “Ойбай-ау, Анатай-ау, не жазығым бар еді” десе, “біреудің бағындағы әп-әдемі гүлді жұлып алып, оның өмірін күлге айналдырғаның үшін.

Ана беліңнен шыққан ұрпағыңның кеудесінде ешқашан ұмытылмайтын, мәңгілік ыза-кек ұялатқаның үшін, әйелің мен балаларыңның жүрегін қан жылатып, қалған өмірін қиыншылыққа толтырғаның үшін сенің барар жерің тозақ, Албасты!” дер едім.

Одан да басқа небір сойқан әңгімені құрастырып айта берер ем. Одан қалса, күнде кешкісін баратын ауызашарыма бір-бір ертегі дайындап қояр едім де, дүйім жұртты аузыма қаратып, ұйытып тыңдатар едім. Менің темам — қатынын қорлаған еркектер туралы болатын еді. Олардың барар жері тозақ және тозақ дей беретін едім..

Төлжан ИМАНАЛЫ, қоғам белсендісі.

Facebook жазбасы.

Фото көрнекілік үшін.