Министрлік «жеті шелпекті» өзімізге «пісіртіп», жүктемек пе?
ҚР Мәдениет және ақпарат министрлігі менің «Жеті шелпек пісіру дәстүрін» ЮНЕСКО-ның материалдық емес мәдени мұралар тізіміне енгізу туралы ұсынысымды қарастырып, тиісті құжаттарды өзімнен сұрап отыр.
Бірақ, тоқтаңызшы… аталмыш құжаттарды мен емес, сол министрліктің құрамындағы МӘДЕНИЕТ комитеті дайындауы керек емес пе?!!
Менің Қазақстан азаматы ретінде міндетім — тек ұсыныс жасау, ал оны зерттеп, рәсімдеп, ЮНЕСКО-ға жолдау – мемлекеттің жұмысы ғой, сонда қазақтың салт-дәстүрі мен ұлттық мәдениетін әлемдік аренада насихаттауға «МӘДЕНИЕТ» комитеті құлықсыз болғаны ма?!
Өкінішке қарай бұны қазақта өз бидайыңды өзіңе қуырту дейді.
Оның үстіне, қазір жеті шелпек дәстүрін «ширк» пен «бидғат» деп, ұлттық мәдениетімізге шабуыл жасап жүрген деструктивті діни ағымдар бар.
Олардың мақсаты – қазақтың ата-баба дәстүрін жойып, төл мәдениетімізді «ислам» атын жамылған жат идеологиялармен алмастыру.
Сонда министрлік олардың ығына жығылып отыр ма?
Жеті шелпек – біздің ұлттық құндылығымыз!
Егер біз өзіміздің мәдени мұрамызды халықаралық деңгейде қорғап, дәріптемесек, оны кім жасайды немесе халқымыз үшін қасиетті жеті шелпектің халықаралық деңгейде мойындалуы министрлікке қажет емес пе?!
Бұл не бюрократия?
Ұлттық мәдениетімізге қатысты маңызды істі осылай созбалаңға салу дұрыс па?!
Тұрарбек ҚҰСАЙЫНҰЛЫ, қоғам белсендісі.
Facebook жазбасы.
Фото көрнекілік үшін.
