Жемқорлықты литвалық әдіспен жою қолға алынбақ

Сыбайлас жемқорлыққа қарсы қызмет төрағасы Асхат Жұмағалидің Литва Республикасының Қазақстандағы Елшісі Эгидиус Навикаспен екіжақты кездесуі барысында екі елдің жемқорлыққа қарсы іс-қимылдағы өзара ынтымақтастығы мәселелері қаралды.

Бұл туралы Azattyq Rýhy ведомствоның баспасөз қызметіне сілтеме жасап хабарлайды.

Ведомство мәліметінше, өз сөзінде Асхат Жұмағали литвалық әріптестерін елімізде жүргізіліп жатқан жемқорлыққа қарсы реформалармен, Агенттік қызметінің негізгі бағыттарымен, оның ішінде Сыбайлас жемқорлыққа қарсы саясатының 2022-2026 жылдарға арналған тұжырымдамасын іске асырумен, мемлекеттік қызметтерді цифрландырумен, заңсыз шығарылған активтерді қайтару жөніндегі шаралармен және Қазақстанда инвесторларды қорғау мәселелерімен таныстырды.

«Литваның жемқорлыққа қарсы іс-қимыл тәжірибесін зерделеуге және пайдалануға, сондай-ақ осы саладағы бірлескен жобалар мен елдеріміздің елшіліктерінің ведомствоаралық және мемлекетаралық деңгейлерде жәрдемдесуіне қызығушылық білдірілді.

Литва Республикасының Елшісі Қазақстан қабылдап жатқан реформалардың, оның ішінде жемқорлыққа қарсы саясатты іске асыру жөніндегі жүйелі және кешенді шаралардың маңыздылығын атап өтіп, консультациялық-практикалық тәжірибе алмасуды белгілеуді ұсынды.

Сонымен қатар Эгидиус Навикас екі елдің жемқорлыққа қарсы ведомстволары, атап айтқанда, Литва Республикасының Арнайы тергеу қызметі арасындағы әріптестік қатынастарды дамыту перспективаларына сенім білдірді», — делінген хабарламада.

Ведомство мәліметінше, тараптар жемқорлыққа қарсы бірлескен жобалар мен бастамаларға өзара қызығушылық танытты.

Фото интернеттен алынды.