Танымал адвокат Ләззат Ахатова кеше қайтыс болған экс шенеунік Ержан Бабақұмаров туралы жұрт білмейтін шындықты айтты деп жазады Democrat.kz.
"Ержан Жалбақұлын (Бабақұмаров) 50 мыңдық аяқ киімге бола майдаланды деп ойламаймын. Мүлде сенімсіз, ұйқаспайтын вариант..
Ақпарат вице министрі, Алматы қаласы әкімінің орынбасары, Президенттің кеңесшісі болған кісіні хабарландыру арқылы аяқ киім сатып алып, оның жарты ақшасын бермей, ол аздай, сатушыны, яғни танымайтын адамды арақ ішуге шақырып, бірге ішті дейтін қисын мүлде қисынсыз. Күдікті тергеуде солай жауап беріпті - мыс.
Марқұм Ерекеңмен қатты араласпасам да, жарты жылдай бір командада жұмыс істеп едік. “Әділдік және өркендеу” деген Қор құрып, әр өңірде құрылымдарын ашып, қоғам белсенділерін тартып еді.
Астана қаласы бойынша штабты біршама уақыт басқарғаным бар. Әлеуметтік осал топтарға, жұмысшыларға сапалы құқықтық көмек көрсету туралы жоба жасап едік.
Біраз жұмыстар да атқарылды.
Ақкөңіл, қарапайым жан еді..Жүзі жылы болатын. Мейрімді екені содан-ақ көрінетін. Бүгінгі қазасын естіп, төбеден жай түскендей болды.
Әсіресе өзін “Алиханмын” деп таныстырыпты дегенде, таң қалдым. Өйткені Ерекеңнің Алихан есімді туыс інісі істеп еді, сол Қорда.. Ең сенімді көмекшісі болатын.
Ол кісінің 50 мыңдық аяқ киім алуға шамасы жетпейтін, көрінгенмен арақ ішетін адам болмағаны айдан анық.
Бірақ марқұмды дәл осындай кейіпте көрсеткісі келетін мүдделі адамдар тобы бар сияқты көрінеді. Әлгі ұсталған күдіктінің кім екенін білмеймін, бірақ “Алиханмын” деп таныстырды деген уәжінің өзі көңілге күдік ұялатады.
Егер ұйымдасқан қылмыс болса, ұрып өлтірген адам тапсырыс орындаған болса, ұйымдастырғандар ол кісінің көмекшілерін де, айналасын да жақсы білетіні көрініп тұр..Кімге, не үшін керек болды екен, ол кісінің өмірін қию?..
Не де болса, мемлекетшіл, жаны жайсаң, іскер, сауатты азаматтың дәл осындай жағдайда, кісі қолынан қаза болғанын қабылдау оңай емес екен..
Жаны жаннатта болсын!.."деп жазды адвокат Ләззат Ахатова.
