4 қазаннан бастап Алматыда коммуналдық арнайы тұрақтарға жеткізілетін көліктер үшін бірыңғай тариф енгізіледі. Жол ережесін бұзған көлікті эвакуациялау құны барлық санат үшін 3 АЕК немесе 12 975 теңге болады, деп жазады Democrat.kz.
Алматы әкімдігі көліктерді эвакуациялау және арнайы тұрақта сақтау қызметіне жаңа төлем тәртібін енгізеді.
Жаңа ереже 4 қазаннан қолданыла бастайды.
Қала мәслихаты бекіткен тариф бойынша бұзушылық жасаған көлікті арнайы тұраққа жеткізу 3 АЕК — 12 975 теңге тұрады.
Тариф көлік санатына қарамастан бірыңғай белгіленген.
Бұдан бөлек, арнайы тұрақта тұрған уақыт үшін бөлек ақы есептеледі. Оның көлемі көліктің санатына және сақтау мерзіміне байланысты.
Жаңа жүйе коммуналдық арнайы тұрақтардағы төлемді біріздендіруге арналған.
Бұл төлем әкімшілік айыппұлдың орнына жүрмейді: жол қозғалысы ережесін бұзғаны үшін салынған айыппұл бөлек төленеді.
