5 қазанда аталып өтетін Мұғалімдер күні жақындаған сайын әлеуметтік желіде ұстаздардың мерекелік сыйақысы қызу талқылана бастады. Бір мұғалім «Биыл мұғалімдерге премия береді дейді ме, әлде менің құлағым шалыс естіді ме?» деп сұраса, пікір иелерінің бірі «Үмітіміз 30 мың болып мөлтеңдеп отырмыз» деп жазған. Алайда Қазақстанда Мұғалімдер күніне барлық педагогке міндетті түрде бірдей көлемде сыйақы төлеу туралы жалпыұлттық норма жоқ, деп жазады Democrat.kz.
Қазақстанда Мұғалімдер күні 5 қазанда атап өтіледі. Бұл күн Үкімет қаулысымен кәсіби мерекелер тізіміне енгізілген.
Мереке жақындаған сайын мұғалімдер арасында «сыйақы бола ма?» деген сұрақ жиілеген. Әлеуметтік желідегі жазба астында:
«Мұғалімдер, айлық түсті ме?»,
«Оны қайдан көрдіңдер?»,
«Үмітіміз 30 000 болып мөлтеңдеп отырмыз» деген пікірлер жазылған.
Ал заңнамаға қарасақ, Мұғалімдер күніне орай барлық педагогке міндетті түрде белгілі бір сомада премия төлеу талабы қарастырылмаған.
«Педагог мәртебесі туралы» заң бойынша жергілікті атқарушы органдар педагогтерге мерекелік күндерге байланысты қосымша көтермелеу шараларын белгілеуге құқылы. Оның ішінде біржолғы ақшалай сыйақы да болуы мүмкін. Бірақ бұл — барлық өңір үшін міндетті төлем емес.
Бюджеттік ұйымдардағы қызметкерлерді сыйлықақымен ынталандыруға да мүмкіндік бар. Үкіметтің №1193 қаулысы бойынша мұндай төлемдер тиісті қаражаттың болуына және белгіленген тәртіпке байланысты жүзеге асырылады. Яғни нақты мектептегі немесе өңірдегі сыйақының берілуі бюджетке, қаржы үнеміне, жергілікті шешімдерге және ұйымның ішкі тәртібіне тәуелді болуы мүмкін.
Сондықтан «2026 жылы барлық мұғалімге Мұғалімдер күніне міндетті түрде 30 мың немесе басқа нақты сома беріледі» деген ақпаратты әзірге жалпы Қазақстанға қатысты ресми шешім ретінде айтуға негіз жоқ.
Бір өңірде немесе мектепте сыйақы берілуі мүмкін, ал басқа жерде мүлде болмауы немесе мөлшері өзгеше болуы ықтимал. Мұғалімдер үшін нақты жауапты өз мектебінің бухгалтериясынан, білім бөлімінен немесе өңірлік білім басқармасынан білуге болады.
