Блогер Салтанат миллиондаған айыппұл арқалады

27 наурыз 2026

532

Мақаланы бөлісу
Блогер Салтанат миллиондаған айыппұл арқалады

Фото интернеттен.

Маңғыстаулық танымал блогер шампунь сатып алу арқылы пәтер мен көлік ұтып алуға болатын ұтыс ойын ұйымдастырғаны үшін ірі көлемде айыппұл алды, деп хабарлайды Democrat.kz. сайты NewTimes.kz.-ке сілтеме жасап. 

Шампуньді 16 мың теңгеге сатып алғандарға пәтер, екі автокөлік және түрлі гаджеттер ұтысқа тігілген шу тудырған акция жалғасын тапты. Маңғыстау облысынан шыққан saltanat.a.e.official никімен танымал блогер бұл акцияны әлеуметтік желілерде белсенді түрде жарнамалаған. Кейін ол әкімшілік жауапкершілікке тартылған.

Туризм және спорт министрлігінің мәліметінше, 23 қаңтар күні оған 1 179 600 теңге көлемінде айыппұл салынған. Бұл — лотерея туралы заңнаманы бұзғаны үшін берілген жаза.

Бұған дейін блогер оқырмандарына шампунь сатып алуды ұсынып, кейін «сәттілік барабаны» атты ұтыс ойынына қатысуды уәде еткен. Жүлде ретінде пәтер, екі автокөлік, тұрмыстық техника және сыйлық жиынтықтары ұсынылған.

Қазақстанда лотереяны тек ресми оператор немесе оның заңды таратушылары ғана өткізе алады. Яғни, Instagram сияқты әлеуметтік желілерде қатысу үшін белгілі бір затты сатып алу немесе ақша төлеу қажет болатын кез келген «ұтыс ойындары» сыйлықпен емес, заңдық мәселелермен аяқталуы мүмкін.

Барлық жаңалықтар