Әлеуметтік желіде Жұлдыз Сүлейменованы қызметінен әкетуді сұраған жазба қызу пікірталасқа ұласты. Бірі мұғалімдердің қағазбастылықтан қажығанын айтса, екіншілері министрді қолдап, оның жұмысына уақыт беру керегін алға тартты, деп жазады Democrat.kz.
Нұргүл Әбілдина Facebook парақшасында Жұлдыз Сүлейменованы басқа қызметке ауыстыруды сұрап, Ақорданың ресми парақшасын белгілеген.
«Құрылтайда бір орын босапты. Өтініш: Жұлдыз Сүлейменованы әкетіп, білім саласын құтқарыңыздар!» — деп жазған ол.
Талқылау министрдің қызметін бағалаудан мұғалімнің күнделікті жұмысы мен мектептегі есептің көлеміне дейін ұласқан.
Пікірлердің бірінде сабақтың қағаз толтырудың тасасында қалып бара жатқаны айтылған. Қолданушы министрдің өзіне қарсылығы жоқ екенін, педагогтерге қолдау керегін жеткізген.
«Түсінбеймін, немене бітпейтін есеп, қағаз… Сабақ қалды жайына», — деп жазған ол.
Оның сипаттауынша, мұғалімнен апталық жоспар, сол жоспардың есебі, фотоесеп, Instagram-ға видео, ата-анамен өткізілген челлендж туралы мәлімет сұратылады. Бұған басқармадан шұғыл талап етілетін құжаттар қосылады. Телефонға дер кезінде жауап бермесе, кері байланыстың жоқтығы үшін ескерту еститінін айтқан.
Қолданушы шұғыл есеп тапсыру үшін балаларға көшіріп жазатын немесе өздігінен орындайтын тапсырма беруге тура келетін жағдайды да сипаттаған. Оның шағымындағы ең ауыр тұс — есепке кеткен уақыттың сабақтан алынуы.
Жұмыс мектептен шыққан соң да аяқталмайтынын жазған пікір иесі келесі күннің сабақ жоспары мен презентациясын дайындап, түнгі сағат 3:30-ға дейін отыратынын жеткізген. Үйге тексеруге әкелген 30 дәптері кейде сол күйі қалатынын да айтқан.
Осы пікірге жауап берген тағы бір қолданушы тәрбие ісі жөніндегі орынбасар болып 14 жыл қызмет еткенін жазып, бітпейтін қағаз, фотоесеп пен күнделікті жиналысты еске алған.
«Сол фотоесеп не үшін қажет? Әр қадамымызға фотоесеп сұрайтын болды ғой», — деген жауап та бар.
Басқа бір пікірде Сүлейменова министр болғаннан бері мұғалімдердің жұмысы мен тексерістер көбейгені айтылған.
Енді бір қолданушы білім саласына қайта-қайта жаңа жүйе енгізілуінен шаршағанын жеткізген. Оның сөзінен басшының кім болатынынан гөрі, мектептің тұрақты жұмыс істеуіне алаңдайтыны аңғарылады.
Алайда министрді әкету талабына қарсы шыққандар да көп. Сүлейменованы қолдаған қолданушылар оның жұмысын оң бағалап, білім саласындағы мәселелерді реттеуге уақыт қажет екенін жазған.
«Қазіргі білім министрлігі жақсы жұмыс жасап жатыр», — деген пікірдің өзі 29 реакция жинаған.
Бір қолданушы министрдің орнында қалуын қолдап, нәтижесін бірнеше жыл өткен соң бағалауды ұсынған. Тағы бірі білім саласында қордаланған мәселелерді бір жылда шешу қиын екенін алға тартқан. Кейбір қолдаушылар сынды министрдің бастамаларына қарсылық ретінде қабылдайтынын білдірген.
Оң өзгерістерді атаған пікір де кездеседі. Бір қолданушы диктант пен мазмұндаманың БЖБ орнына келуін құптап, әсіресе бастауыштағы балаларға жеңіл болғанын жазған.
«Кім лайықты, сіздіңше?» деген сұраққа жазба авторы Ғани Бейсембаевтың есімін атаған. Осы жауаптан кейін пікірталас бұрынғы басшының жұмысына ауысқан: бірқатар қолданушы оның қайта келуіне де қарсы екенін білдірген.
Талқылауда нақты уәжбен бірге кекесін мен жеке басқа тиісу де бар. Бірі автордың өзіне қызметке баруды ұсынса, енді бірі министрді басқа орынға ауыстыру туралы ойды әжуаға айналдырған.
Осылайша, қысқа үндеудің астында екі түрлі бағалау қатар көрінді: Сүлейменованы қолдағандар оның бастамаларына мүмкіндік беруді сұрайды, ал сын айтқандар мұғалімнің есеп пен тексерістен босамай отырғанын алға тартады. Әсіресе «сабақ қалды жайына» деген шағымға берілген жауаптар қағазбастылық мәселесін талқылаудың өзегіне шығарған.
Қаралған пікірлер арасында осы шағымдарға қатысты министрліктің ресми түсіндірмесі кездеспеді.
