Оқу ағарту министрлігінің жанынан құрылған Қоғамдық кеңестің алғашқы жиыны өтіп, алдағы жұмыс жоспарларын бекітті деп хабарлайды Democrat.kz.
Қоғамдық кеңестің төралқа мүшесі болып сайланған білікті ұстаз Өмір Шыныбекұлы осы жиынға және Қоғамдық кеңесте жасаған өз пікірімен бөлісті.
"Кеше Қоғамдық кеңестің алғашқы отырысы өтіп, кеңес төрағасы мен 7 адамнан тұратын төралқа мүшелері сайланып, жұмыс жоспары талқыланды (Кеңесте 21 мүше бар)
Қоғамдық кеңес отырысына министр Ж.Сүлейменова қатысып, құттықтау сөз сөйлеп, өз тілегін білдірді.
Кеңес төрағасы болып Мәжілістің депутаты Мұрат Әбенов сайланды.
Отырыс барысында мен де өз пікірімді білдіріп едім, төраға М.Әбеновке түсіндіре алмаған секілдімін.
Ұсынысымды қабылдамады.
Сол ойымды осында тарқатып жазайын.
"Өткен жылы еліміздің сыртқы саясат саласы толағай табыстарға жетті. Президентіміз Қ.Тоқаев өзінің әлемдегі ең мықты дипломат және көшбасшылардың бірі екенін мойындатты.
Өкінішке қарай, білім саласында проблема жетерлік.Педагогтарымыздың құқықтық сауаты өте төмен.Прокуратураға жазатын арызды басқармаға, басқармаға қарайтын мәселені, білім бақылау департаментіне, Еңбек инспекциясы қарайтын мәселені Ұлттық Қауіпсіздік комитетіне жолдап жатады.Ең соңында осының бәрін министрге жолдайды. Болмаған соң әлеуметтік желіде президентке үндеу жасап жатады.
Тап бір Президенттің өзге шаруасы жоқтай..
Сондықтан ендігі жерде Қоғамдық кеңес жұмысының форматын өзгертіп, айына бір рет болатын отырыстарын өңірлерде өткізіп, қоғамдық қабылдау ұйымдастырайық.
Бұл министрлікке келетін арыз-шағымдар легін азайтып, министрлік пен қоғам арасында буфер ролін атқарар еді.
Түскен арыз-шағымдарды қарап, шағымданушының арызының әрқайсысын тиісті органға жеткізіп отырар едік.
Сонда Президент Қ.Тоқаевтың жарлығымен құрылған Қоғамдық кеңес қоғам және қоғамның ең сауатты бөлігі педагогтардың көзін президентіміздің заң мен тәртіп саясатының жүзеге асырылып жатқанына жеткізген болар еді.
Өкінішке қарай, менің ұсынысымды Қоғамдық кеңестің бірнеше мүшесі қолдаса да, төраға М.Әбенов тарапынан қолдау таппады.
Айта кетейік, Қоғамдық кеңестің негізгі міндеттері:
Шешімдерді талқылау және қабылдау кезінде азаматтық қоғамның мүдделерін білдіру; Қоғамдық бақылауды ұйымдастыру; Мемлекеттік орган қызметінің ашықтығын қамтамасыз ету.Кеңес құрамына педагогтер, жекеменшік білім беру ұйымдарының, үкіметтік емес ұйымдардың және БАҚ өкілдері кірді", деді Өмір Шыныбекұлы.
