Жаңа оқу жылының басталуына санаулы күндер қалса да, еліміздегі бірқатар білім беру ұйымдарында оқулықтармен қамтамасыз ету мәселесі әлі толық шешімін таппай отыр. Тамыз айының ортасы таяғанмен, кейбір мектептерде оқулық сатып алу бойынша келісімшарттар аяқталмаған, ал оқушы саны өскен білім ордаларында қосымша кітап қорын толықтыру тетігі белгісіз болып қалуда деп жазады Democrat.kz.
Педагогтердің алаңдаушылығы
Мектеп басшылары мен мұғалімдер жаңа басылымдар мен жетіспейтін кітаптардың мектептерге өз уақытында жеткізілуіне күмәнмен қарайды. Еліміздің бірқатар педагогтері бұл мәселенің жыл сайын қайталанатын «созылмалы дертке» айналғанын айтып, дабыл қағуда.
«Сабақтың басталуына 25 күн қалды. Оқулықты енді қашан жеткізеді? Әдеттегідей қыркүйек пен қазанда таратып жүретін шығармыз», — дейді әлеуметтік желіде бұл мәселег қатысты пікір жазған мұғалімдер.
Мұғалімдердің айтуынша, сабақ басталған соң айлап кітап күту немесе толық емес қормен оқыту педагогке де, оқушыға да, ата-аналарға да үлкен психологиялық әрі әдістемелік салмақ түсіреді.
Түйінді түйткілдер неде?
-
Келісімшарттардың кешігуі: Жергілікті білім басқармалары мен баспалар арасындағы мемлекеттік сатып алу және логистикалық келісімшарттардың уақытылы бекітілмеуі басылымдардың мектеп кітапханаларына кеш түсуіне себеп болады.
-
Демографиялық өсім және оқушы санының артуы: Әсіресе ірі қалалар мен қарқынды дамып жатқан өңірлерде оқушы саны жыл сайын артып келеді. Осы орайда, қосымша қажеттіліктерді дұрыс болжамау оқулық тапшылығын тудырады.
-
Реформалар мен оқулықтарды жаңарту циклі: Белгіленген бағдарламаларға сәйкес (мәселен, 3 және 7-сыныптарға арналған жаңа оқулықтарға көшу), оқу материалдарын басып шығару, сараптамадан өткізу және «Е-Таңдау» сияқты электронды платформалар арқылы таңдау процестерінің созылып кетуі тарату мерзімін шегеріп жібереді.
Не істеу керек?
Білім саласының сарапшылары оқулық логистикасын 1 қыркүйекке дейін толық аяқтау — сапалы оқу процесін ұйымдастырудың басты шарты екенін айтады. Ол үшін:
-
Баспалар, жергілікті атқарушы органдар мен мектептер арасындағы цифрлық мониторингті күшейту;
-
Оқушы санының өсімін алдын ала есепке алып, резервтік кітап қорын қалыптастыру;
-
Электронды оқулықтар базасын толық қолжетімді етіп, баспа нұсқалары жеткенше балама ретінде ұсыну қажет.
