Прокуратура Өскемен қаласының бұрынғы әкімі Жақсылық Омарға шыққан сот үкімі бойынша түсініктеме берді, деп жазады Democrat.kz.
Өткен жұмада Өскемен қаласының қылмыстық істер жөніндегі ауданаралық сотында қала әкімінің бұрынғы басшысы, Шығыс Қазақстан облысы әкімінің бірінші орынбасары болған Жақсылық Омарға қатысты үкім шықты.
Прокуратура Жақсылық Омардың бірқатар сыбайлас жемқорлыққа қатысы барын, қызметтік өкілеттігін асыра пайдаланғанын мәлімдеді.
«Бұл әрекеттер сыбайлас жемқорлық қылмыстары санатына жатады және мемлекеттік қызмет негіздеріне, қоғамның сеніміне нұқсан келтіреді. Мемлекеттік айыптау тарапы істің қысқартылған тәртіпте қаралғанын ескере отырып, заңда көзделген ең қатаң жазаны сұрады», деп хабарлады прокуратура.
Сонымен қатар, прокуратура сыбайлас жемқорлық қылмыстары үшін сотталғандарға амнистия актілері мен шартты түрде мерзімінен бұрын босату нормалары қолданылмайтынын ескертті.
