Танымал белсенді ұстаз Мейіржан Темірбек биылғы оқу жылында пән атауларының өзгеретін жаңалыққа қатысты өз пікірін білдіріп, мұғалімдердің сағат жүктемесіне қатысты Оқу ағарту министріне сауал жолдады деп жазады Democrat.kz.
"Жұлдыз Сүлейменова әйтеуір ат өзгертуден бірінші орында шығармыз. «Цифрлық сауаттылық» және «Информатика» оқу пәндерінің атауларын тиісінше «Цифрлық сауаттылық және жасанды интеллект» және «Информатика және жасанды интеллект» деп өзгертуді ұсынған екенсіздер.
"Тасты жапалақпен ұрса жапалақ өледі, жапалақты таспен ұрса жапалақ өледі". Мен өткен посттарымда айттым ғой, жаңа неше түрлі пәндерге арнайы сағат қосылмайды, не пәннің атауын өзгертеді, алып жүрген сағат ішінде немесе сынып жетекшілердің құлағын бұрайды. Алдыңғы жобаларында да көрдіңіздер, "сынып сағаттың шеңберінде" қосылған.
Енді сұрақ: Материалдық техникалық база дайын ба? Әлде оқушылардың смартфонға шұқшиюын әрі қарай жалғастырамыз ба? Кітаптар дайын ба? Курстар "ақшаның тапшылығына" байланысты жергілікті жерлерде ұйымдастырылады деді. Былтыр демалысқа шықпай тұрып Өрлеу ЖИ бойынша курстар оқытамыз деп адамдардың сұраныстары болғанына қарамастан артынша тежегіштерін басып жергілікті ауылда оқытуды шешкен.Қаладағы мамандандырылған лицейлерде интернет пен компьютер болғанымен, алыс ауылдардағы мектептерде қарапайым интернет жылдамдығы ЖИ құралдарын (ChatGPT, нейрожелілер) ашуға жетпейді. Атауды өзгерткеннен ауыл баласы ЖИ-ді көре алмайды.Атақты нейрожелілердің көбінде жас шектеуі (13+ немесе 18+) бар және оларға тіркелу үшін аккаунт немесе телефон нөмірі керек. Мектепте 3-4 сынып оқушыларына ЖИ-ді қалай практикада көрсетпекші?
Мұндай асығыс өзгерістер мұғалімдердің мойнына қосымша қағазбастылық пен есеп беру жүгін арттырады. Бағдарламада «ЖИ өтілді» деп жазылады, бірақ іс жүзінде ештеңе үйретілмейді.
Былтыр берген ақшасы төленген ЖИ дің де әуселесін көрдік қой...
Мектептерді жергілікті әкімдіктерге бердік, енді өркендейтін шығармыз иә, Куат Окасов мырза?!", - деп жазды Мейіржан Темірбек.
Белсенді ұстаздың бұл жазбасына қатысты әріптестері "ауыл тұрмақ, қалалардың кей аудандарында интернет жылдамдығы төмен", "ЖИ қосымшасы ақылы" екенін айтып, пікір білдіруде.
