"Қарабет болғандай сезінемін" деген спортшының қазіргі жағдайы жұртты алаңдатты

18 мамыр 2026

104

"Қарабет болғандай сезінемін" деген спортшының қазіргі жағдайы жұртты алаңдатты

Фото видеодан скринделді.

Астанада тозығы жеткен үйде 20 жылдан бері тұрып жатқан параспортшы көмекке мұқтаж. Сал ауруымен ауыратын азаматтың жалдамалы үйі құлаудың аз-ақ алдында тұр.Оның үстіне, бала кезден туыстарының тарапынан қиянат көріп, жәрдемақысынан да қағылған көрінеді. Темірді иіп, тағдырмен күресіп жүрген ауыр атлетика шебері жанайқайын жеткізді,деп жазады Democrat.kz. сайты КТК телеарнасына сілтеме жасап.

Телеарна дерегінше, қиындықпен жалғыз алысып келе жатқан Ғани Рахымжан тозығы жеткен, шатыры шұрық-тесік үйдің бір бұрышында тұрып жатқанына 20 жылдан асқан. Құлаудың аз-ақ алдында тұрған баспананың жаңбыр жауса, төбесінен су сорғалап, әбден берекесін қашырған.

“Осы жерде жуынамын. Қыста пеш жағамыз, көмір пайдаланамыз, ағашпен көмір жағамыз. Мына жерде киімімді ауыстырып, жататын бөлме, кейде қыста қабырғасы өте суық болады”, - дейді ол.

37 жастағы Ғанидің сал ауруының кесірінен талай жолы жабылған. Айтуынша, тіпті туған анасы бала кезден бері жәрдемақысын бермей, емдетпеген де.

“Жәрдемақымды анам алып жүрген. Шынымды айтсам, жаныма бататыны сол. Өйткені, мен, мысалы, қалаға бірге оқитын балалармен барғанда, солардың қасында ақшасыз отырғанда, өзімді қарабет болғандай сезінемін”, - дейді Ғани Рақымжан.

Параспортшының есту қабілеті де нашар. Есту құрылғысын жоғалтып алғалы, “көрген күнім азап” дейді. Бір аяғының қысқалығымен жұмысқа барып-келуінің өзі мұң. Қазір Паралимпиадалық орталықтың жаттығу залында нұсқаушы болып жұмыс істейді. Мүмкіндігі шектеулі жандарға көмектесіп жүріп, өзі де ауыр атлетикадан жарыстарға дайындалады.