Оқу-ағарту министрі Жұлдыз Сүлейменова республикалық жазғы сессияға қатысушылармен ашық диалог өткізді. Ұстаздар бағалау, цифрлық шешімдер, оқу процесі және кәсіби даму туралы сұрақ қойды деп жазады Democrat.kz.
Министрлік таратқан ақпаратқа сәйкес, Жұлдыз Сүлейменова жазғы сессияға келген педагогтермен кездесіп, жаңа оқу жылына қатысты сұрақтарға жауап берген. Мұғалімдер оқу процесін ұйымдастыру, бағалау жүйесі, цифрлық технологиялар, кәсіби даму және саладағы өзге де мәселелерді көтерген.
Министр педагогтердің ұсыныстары білім беру жүйесін жетілдіру кезінде ескерілетінін айтқан. Алайда мұндай диалогтың нақты құны айтылған ұсыныстардың кейін қандай құжатқа, бұйрыққа немесе шешімге айналғанынан көрінеді.
Қазақстан мұғалімдері жыл сайын жаңа платформа, жаңа есеп, жаңа бағдарлама және жаңа бағалау талабына тап болады. Әр жаңалық «жұмысты жеңілдетеді» деген уәдемен енгізілгенімен, кейде педагогтің цифрлық міндетін көбейтіп жібереді. Сондықтан мұғалімдер қойған сауалдар мен министрліктің берген жауаптары хаттама немесе ашық қорытынды түрінде жарияланса, қоғам да оның орындалуын бақылай алар еді.
Министрлік педагогтердің пікірі ескерілетінін және жаңа өзгерістер туралы жан-жақты түсіндіру берілгенін хабарлады.
