Әнші Алтынай Жорабаева әлеуметтік желідегі парақшасында жаңа құдаларының әкелген сый-сияпатын көрсетіп, оларға алғысын білдірді. Жарияланған видеодан құдалардың әншінің қызына қалыңмал ретінде 15 миллион теңге бергенін көруге болады деп жазады Democrat.kz.
Өнер иесі жаңа туыстарының ықыласына ризашылығын білдіріп, екі әулеттің ынтымағы арта берсін деген тілегін жазды.
«Жаңа құдаларымыздың ақ ниетпен алып келген сый-сияпаттары. Әкелген әрбір сыйына шын жүректен алғыс айтамыз. Береке-бірлігіміз арта берсін!» – деді әнші.
Жарияланымнан кейін желі қолданушылары екі жасқа бақыт тілеп, ақжарма тілектерін жолдады. Алайда көпшіліктің назарын ең алдымен қалыңмалдың көлемі аударды.
Бірқатар пікір иесі 15 миллион теңгені шамадан тыс сома деп бағалап, мұндай дүниені әлеуметтік желіде көрсету мақтанға ұқсайтынын жазды.
«Біреулер күнкөріске қиналып отырғанда, осындай байлықты көрсету дұрыс емес», – деген мазмұндағы пікірлер де кездескен.
Енді бір қолданушы қалыңмалдың салттық мәні бар екенін айтып, оның көлемі қоғамдағы қалыпты өлшемнен алшақтамауға тиіс деген ойын білдірді.
«15 миллион артық емес пе? Қалыңмал – салт-дәстүр. Қанша жерден жағдайы жақсы болса да, елден ерекше болудың қажеті жоқ шығар. Сол қаражатты кейін жас отбасының тұрмысына жұмсаған әлдеқайда дұрыс болар еді. Дегенмен екі жасқа бақыт тілеймін», – деп жазған ол.
Қалыңмал қазақ қоғамында екі әулеттің арасындағы келісім мен жауапкершілікті білдіретін дәстүрдің бірі саналады. Алайда оның нақты мөлшері заңмен бекітілмеген және әр отбасының жағдайы мен өзара келісіміне қарай белгіленеді.
Сондықтан бұл жерде мәселе 15 миллион теңгенің «дұрыс» немесе «бұрыс» болуында ғана емес. Әлеуметтік желі дәуірінде отбасылық рәсімдердің байлық көрсету алаңына айналып кетпеуі де маңызды.
