Қазақстанда орталықтандырылған ауызсуды автокөлік жуу станцияларында технологиялық мақсатта пайдалануды шектеу жөнінде заңнамалық түзетулер әзірленді. Су ресурстары министрлігі бұл бастаманы суды үнемдеу және су қауіпсіздігін қамтамасыз ету шараларымен байланыстырып отыр. Алайда ұсыныстың нақты талаптары мен күшіне ену мерзімі әлі анықталуы керек, деп жазады Democrat.kz.
Су ресурстары және ирригация министрі Нұржан Нұржігітов 29 қазанда өткен Үкімет отырысында су ресурстарын ұтымды пайдалану бағытындағы жұмыстар туралы баяндады.
Министрдің мәліметінше, орталықтандырылған ауызсуды автомойкаларда технологиялық процестерге пайдалануды шектеуге арналған өзгерістер Су кодексіне енгізілетін түзетулер аясында дайындалған.
Мұндай бастаманың өзектілігі — ауызсудың халықтың тұрмыстық қажеттіліктері үшін маңызында. Әсіресе су ресурстары тапшы өңірлерде суды тұтыну құрылымын қайта қарау маңызды.
Министрлік дерегіне сәйкес, соңғы екі жылда 1,4 мың шақырымнан астам канал, бес су қоймасы және сегіз гидротехникалық құрылыс қайта жаңартылған. Сонымен қатар 4,6 мың шақырымнан астам ирригациялық желіні жаңғырту жұмыстары жүргізіліп жатыр.
Су саласына 2023 жылғы қыркүйектен бері тартылған негізгі капитал инвестицияларының көлемі шамамен 1 триллион теңгеге жеткені хабарланды.
Егер ұсынылған түзетулер қабылданса, автомойкалар суды пайдалану тәсілдерін қайта қарауға мәжбүр болуы мүмкін. Дегенмен әзірге бұл бастаманы барлық автомойкаға қатысты күшіне енген тыйым ретінде көрсету дұрыс емес.
