Қаржылық мониторинг агенттігі Астанада заңсыз интернет-казинолардың қызметін ұйымдастыруға қатысты тергеуді аяқтап, қылмыстық істі сотқа жолдады. Тергеу дерегіне сәйкес, төлем инфрақұрылымы арқылы 188 миллиард теңгеден астам операция жүргізілген. Күдіктілердің активтеріне де тыйым салынған, деп жазады Democrat.kz.
Агенттіктің мәліметінше, іс Nomadgames және Sultangames интернет-казиноларына, сондай-ақ олардың көшірме сайттарына қатысты қозғалған.
Ойыншылардан ақша қабылдау үшін төлем ұйымдары, банктік эквайринг, POS-терминалдар, интернет-терминалдар, электрондық әмияндар және криптовалюта құралдары пайдаланылғаны айтылады.
Тергеушілердің нұсқасы бойынша, банк саласының кейбір өкілдері төлем инфрақұрылымын қосуға көмектескен. Операциялар нақты мақсатын жасыру үшін заңды букмекерлік немесе өзге шаруашылық қызметтің төлемдері ретінде көрсетілген.
Қаржылық мониторинг агенттігі заңсыз операциялардың жалпы сомасы 188 миллиард теңгеден асқанын хабарлады. Бұдан бөлек, жалған шарт арқылы бір компанияның есепшотына 10 миллиард теңге түскені, ал кейін цифрлық активтердің 19 миллион USDT көлемінде күдіктілердің криптоәмияндарына аударылғаны айтылған.
Соттың санкциясымен үш пәтерге, алты автокөлікке, криптоактивтерге және банктік шоттардағы қаражатқа жалпы 1,4 миллиард теңге көлемінде тыйым салынған.
Агенттік дерегіне сәйкес, үш күдікті қамауда отыр, тағы үшеуі кепілмен босатылған, ал екі адамға елден шықпау туралы шектеу қойылған.
Қылмыстық істің сотқа жіберілуі күдіктілердің кінәсі дәлелденді дегенді білдірмейді. Олардың әрекеттеріне түпкілікті құқықтық бағаны сот береді.
