Мұғалімдер күніне орай ұстаздарға тосынсый әзірлеген оқушылардың әрекеті күтпеген жағдайға ұласты. Мектеп ішінде түрлі түсті түтін шығаратын пиротехникалық бұйым қолданылып, өрт дабылы іске қосылған. Салдарынан оқушылар мен мұғалімдер ғимараттан эвакуацияланып, оқиға орнына төтенше жағдай қызметкерлері жеткен, деп жазады Democrat.kz.
Оқиға 2 қазанда Атырау қаласындағы Авангард-2 ықшамауданында орналасқан №19 орта мектепте болған.
Алдын ала мәлімет бойынша, оқушылар Мұғалімдер күніне байланысты ұстаздарына ерекше тосынсый жасауды жоспарлаған. Олар кәдімгі конфетти немесе мерекелік безендірудің орнына түрлі түсті түтін шығаратын пиротехникалық бұйым қолданған.
Алайда мерекелік көңіл күй сыйламақ болған әрекет күтпеген салдарға әкелген.
Түтін бөлме ішіне тез тарап, мектептегі өрт дабылы іске қосылған. Қауіпсіздік талаптарына сәйкес ғимараттағы адамдар сыртқа шығарылып, оқиға орнына төтенше жағдай қызметкерлері келген.
Абырой болғанда, зардап шеккендер жоқ.
Қалалық білім бөлімі оқушылардың пиротехникалық бұйымды мектеп әкімшілігіне алдын ала ескертпей әкелгенін хабарлаған.
Оқиғаның қорытындысы бойынша білім беру ұйымының басшысы әкімшілік жауапкершілікке тартылған.
Бұл жағдай әлеуметтік желіде де талқыға түсті. Бірқатар қолданушы балалардың ұстаздарын қуантқысы келгенін түсінуге болатынын айтса, енді бірі мектеп ішінде пиротехникалық бұйым қолданудың қауіпті екенін жазған.
Әсіресе көпшілік «мерекелік тосынсый» мен қауіпсіздік талаптарының ара-жігін ажырату керектігін алға тартады.
Мектеп – жүздеген бала бір мезетте болатын орын. Сондықтан түтін, от, пиротехника секілді заттардың кез келгені дүрбелең туғызып қана қоймай, нақты қауіпке айналуы мүмкін.
Бұл жолы оқиға адам шығынынсыз аяқталды.
Алайда Мұғалімдер күніне арналған қарапайым тосынсыйдың бүкіл мектепті эвакуациялауға ұласуы – мерекелік шараларды ұйымдастыру кезінде қауіпсіздік мәселесіне ерекше мән беру керектігін тағы бір рет көрсетті.
