«Аутист балалар мүгедек емес, олар – дарынды»: танымал әнші қызы жайлы айтты

Белгілі әнші Жасұлан Базарбай қызының аутист екенін айтып, қоғамның мұндай балаларға деген көзқарасын өзгерту қажеттігін алға тартты.

«Менің қызым – аутист. Ол сөйлемейді. Бірақ ән айтады. Үйде ешкім орысша сөйлемейді, алайда ол кез келген тілде – ағылшынша, кәрісше – ән орындай алады. Себебі, ол ән арқылы өзін білдіреді, эмоциясын жеткізеді. Ол жай ғана бала емес, ерекше бала. Дарынды, терең сезетін. Тек әлеммен байланысу тәсілі басқаша» – деп жазды әнші.

Әнші аутист балалар туралы зерттеу жүргізіп жүргенін және олардың бойындағы ерекше қабілеттерді көпшілік дұрыс түсінуі керек екенін айтты.

«Қазір мен осындай балаларды зерттеп жүрмін. Көп ата-анамен сөйлесем, олардың балалары да сөйлемесе де, сурет салады, музыка сезінеді, сандармен ойнайды. Бірақ біздің қоғам мұндай баланы бірден «мүгедек» деп санап, қағазға тәуелді етеді. Бұл дұрыс емес», – деді ол.

Жасұлан Базарбай аутист балаларды қабылдап, оларға мүмкіндік беру керектігін баса айтты.

«Олар біз ойлағандай әлсіз емес. Олар бізден де таза, пәк әлемде өмір сүреді. Оларға жанашырлық емес, түсіністік пен мүмкіндік керек», – деп түйіндеді ол.